ആൻഡ്രോയിഡ് കുഞ്ഞപ്പൻ ഇനി തമിഴ് പറയും; ട്രൈലെർ കാണാം..!

മലയാളത്തിൽ സൂപ്പർ ഹിറ്റായി മാറിയ ചിത്രമാണ് രതീഷ് ബാലകൃഷ്ണ പൊതുവാൾ ഒരുക്കിയ ആൻഡ്രോയിഡ് കുഞ്ഞപ്പൻ. സുരാജ് വെഞ്ഞാറമൂട്, സൗബിൻ ഷാഹിർ, സൈജു കുറുപ്പ് എന്നിവർ പ്രധാന വേഷങ്ങൾ ചെയ്ത ഈ ചിത്രം വലിയ പ്രേക്ഷക പ്രശംസയും നിരൂപക പ്രശംസയുമാണ് നേടിയെടുത്തത്. ഇപ്പോഴിതാ ഈ ചിത്രത്തിന്റെ തമിഴ് റീമേക് എത്തുകയാണ്. തമിഴിൽ ഈ ചിത്രത്തിന്റെ പേര് കൂകിൾ കുട്ടപ്പ എന്നാണ്. ഈ ചിത്രത്തിന്റെ ട്രൈലെർ ഇപ്പോൾ പുറത്തു വന്നു കഴിഞ്ഞു. കെ എസ് രവികുമാർ, യോഗി ബാബു, ദർശൻ, ലോസ്‌ലിയാ എന്നിവർ പ്രധാന വേഷങ്ങൾ ചെയ്യുന്ന ഈ തമിഴ് ചിത്രം സംവിധാനം ചെയ്തിരിക്കുന്നത് ശബരി, ശരവണൻ എന്നിവർ ചേർന്നാണ്. കെ എസ് രവികുമാർ തന്നെയാണ് ഈ ചിത്രം നിർമ്മിച്ചിരിക്കുന്നതും.

ജിബ്രാൻ സംഗീതം ഒരുക്കിയ ഈ തമിഴ് റീമേക്കിന് കാമറ ചലിപ്പിച്ചത് അർവിയും എഡിറ്റ് ചെയ്തത് പ്രവീൺ ആന്റണിയും ആണ്. സാരിഗാമ തമിഴിന്റെ യൂട്യൂബ് ചാനലിൽ ആണ് ഈ ട്രൈലെർ റിലീസ് ചെയ്തിരിക്കുന്നത്. 2019 ഇൽ റിലീസ് ചെയ്ത ആൻഡ്രോയിഡ് കുഞ്ഞപ്പൻ ശ്രദ്ധ നേടിയത് അതിന്റെ വ്യത്യസ്‌തമായ പ്രമേയവും അതുപോലെ സുരാജ് വെഞ്ഞാറമൂടിന്റെ അതിഗംഭീര പ്രകടനവും കൊണ്ടാണ്. മൂൺ ഷോട്ട് എന്റർടൈൻമെൻറ്സിന്റെ ബാനറിൽ സന്തോഷ് ടി കുരുവിള നിർമ്മിച്ച ഈ ചിത്രം ഹാസ്യവും സയൻസും എല്ലാം കോർത്തിണക്കിയാണ് ഒരുക്കിയിരിക്കുന്നത്. സാനു ജോൺ വർഗീസ് ദൃശ്യങ്ങൾ ഒരുക്കിയ ഈ ചിത്രം എഡിറ്റ് ചെയ്തത് സൈജു ശ്രീധരനും ഇതിനു വേണ്ടി സംഗീതം ഒരുക്കിയത് ബിജിപാലും ആണ്. ഒരു റോബോട്ട് ആണ് ഈ ചിത്രത്തിലെ ടൈറ്റിൽ കഥാപാത്രമെന്നതാണ് ഇതിന്റെ ഏറ്റവും വലിയ രസം.