കലപില കാര്യം പറയണ കണ്ണ്; സൂപ്പർ ഹിറ്റായി വിശുദ്ധ മെജോയിലെ പ്രണയ ഗാനം; വീഡിയോ കാണാം

തണ്ണീർമത്തൻ ദിനങ്ങൾ എന്ന ചിത്രത്തിന്റെ സഹരചയിതാവായും അതിലെ രസകരമായ ഒരു വേഷം ചെയ്‌തും വലിയ ശ്രദ്ധ നേടിയ ആളാണ് ഡിനോയ് പൗലോസ്. ബ്ലോക്ക്ബസ്റ്ററായ ആ ചിത്രത്തിന് ശേഷം ഡിനോയ് പൗലോസിനെ നമ്മൾ കണ്ടത് പത്രോസിന്റെ പടപ്പുകൾ എന്ന ചിത്രത്തിലൂടെയാണ്. അതിലെ നായക വേഷം ചെയ്ത ഡിനോയ് തന്നെയാണ് ആ ചിത്രത്തിന് തിരക്കഥ രചിച്ചതും. ഏതായാലും ഈ രണ്ടു ചിത്രങ്ങളും ഡിനോയ് പൗലോസിന് മികച്ച ജനപ്രീതിയാണ് നേടിക്കൊടുത്തത്. ഇപ്പോഴിതാ ഡിനോയ് നായകനായെത്തുന്ന പുതിയ ചിത്രം വരികയാണ്. വിശുദ്ധ മെജോ എന്ന് പേരിട്ടിരിക്കുന്ന ഈ ചിത്രത്തിലെ നായികാ വേഷം ചെയ്തിരിക്കുന്നത് ലിജോ മോൾ ജോസാണ്. നവാഗതനായ കിരൺ ആൻറണി സംവിധാനം ചെയ്തിരിക്കുന്ന ഈ ചിത്രം രചിച്ചതും നായകനായ ഡിനോയ് പൗലോസ് തന്നെയാണ്. ഇപ്പോഴിതാ ഇതിലെ ആദ്യ ഗാനത്തിന്റെ വീഡിയോ റിലീസ് ചെയ്തിരിക്കുകയാണ്.

ഡിനോയ്, ലിജോ മോൾ കഥാപാത്രങ്ങളുടെ പ്രണയം കാണിച്ചു തരുന്ന രസകരമായ ഈ ഗാനം ഇപ്പോൾ സോഷ്യൽ മീഡിയയിൽ സൂപ്പർ ഹിറ്റാണ്. തണ്ണീർമത്തൻ ദിനങ്ങൾ സിനിമയിലെ നായകനായ മാത്യു തോമസ്, ബൈജു എഴുപുന്ന, ഈനിവരും പ്രധാന വേഷങ്ങൾ ചെയ്യുന്ന ഈ ചിത്രം നിർമ്മിച്ചിരിക്കുന്നത് പ്രശസ്ത എഡിറ്ററായ ഷമീർ മുഹമ്മദും, പ്രശസ്ത ഛായാഗ്രാഹകനായ ജോമോൻ ടി ജോണും, വിനോദ് ഷൊർണൂരും ചേർന്നാണ്. ചിത്രത്തിൻറെ നിർമ്മാതാവു കൂടിയായ ജോമോൻ ടി ജോൺ ഛായാഗ്രഹണം നിർവഹിച്ചിരിക്കുന്ന ഈ ചിത്രം എഡിറ്റ് ചെയ്യുന്നത് ഷമീർ മുഹമ്മദും ഇതിനു സംഗീതമൊരുക്കിയത് ജസ്റ്റിൻ വർഗീസുമാണ്. കലപില കാര്യം പറയണ കണ്ണ് എന്ന വരികളോടെ തുടങ്ങുന്ന, ഇപ്പോൾ പുറത്തു വന്നിരിക്കുന്ന ഈ ഗാനം രചിച്ചിരിക്കുന്നത് സുഹൈൽ കോയയും, ഈ ഗാനമാലപിച്ചിരിക്കുന്നത് അദീഫ് മുഹമ്മദുമാണ്. കൊച്ചിയിലും പരിസരപ്രദേശങ്ങളിലുമായാണ് ഈ റൊമാന്റിക് കോമഡി ചിത്രം ചിത്രീകരിച്ചിരിക്കുന്നത്.