സോഷ്യൽ മീഡിയ പറയുന്നു ഇത് നായകനെ കവച്ചു വെക്കുന്ന വില്ലൻ; മിഖായേൽ രണ്ടാം ടീസർ സൂപ്പർ ഹിറ്റ്..!

ഇന്നാണ് മിഖായേൽ എന്ന നിവിൻ പോളി- ഹനീഫ് അദനി ചിത്രത്തിന്റെ രണ്ടാം ടീസർ റിലീസ് ചെയ്തത്. റിലീസ് ചെയ്ത നിമിഷം മുതൽ സോഷ്യൽ മീഡിയയിൽ ട്രെൻഡിങ് ആണ് ഈ ടീസർ. മിഖായേൽ എന്ന നായക വേഷത്തിൽ നിവിൻ പോളിയും മാർക്കോ എന്ന വില്ലൻ വേഷത്തിൽ ഉണ്ണി മുകുന്ദനും തകർത്താടിയ ഒരു ടീസർ ആണ് അണിയറ പ്രവർത്തകർ പുറത്തു വിട്ടിരിക്കുന്നത്. കിടിലൻ ആക്ഷൻ രംഗങ്ങളും പഞ്ച് ഡയലോഗുകളും സ്റ്റൈലിഷ് രംഗങ്ങളും നിറഞ്ഞ ഒരു കിടിലൻ ടീസർ തന്നെയാണ് ഇതെന്ന് നിസംശയം പറയാൻ സാധിക്കും. നായകനെ കവച്ചു വെക്കുന്ന വില്ലൻ പരിവേഷം ആണ് ഉണ്ണി മുകുന്ദൻ ഈ ടീസറിൽ പ്രേക്ഷകർക്ക് മുന്നിൽ കാഴ്ച വെച്ചിരിക്കുന്നത്.

ഉണ്ണി മുകുന്ദന് ഒരുപാട് അഭിനന്ദനങ്ങളും ലഭിക്കുന്നുണ്ട് ഇപ്പോൾ. കിടിലൻ ലുക്കിൽ , പക്കാ മാനറിസങ്ങളോടെ ഒരു മെഗാ മാസ്സ് വില്ലൻ ആയാണ് ഉണ്ണി മുകുന്ദൻ എത്തുന്നത് എന്നുറപ്പായി കഴിഞ്ഞു. വമ്പൻ താര നിര അണിനിരക്കുന്ന ഈ ചിത്രത്തിൽ മഞ്ജിമ മോഹൻ ആണ് നായികാ വേഷം  ചെയ്യുന്നത്. ആന്റോ ജോസെഫ് ഫിലിം കമ്പനിയുടെ ബാനറിൽ ആന്റോ ജോസെഫ് നിർമ്മിച്ച ഈ ചിത്രത്തിൽ സിദ്ദിഖ്, സുരാജ് വെഞ്ഞാറമ്മൂട്, കെ പി എ സി ലളിത, അശോകൻ, സുദേവ് നായർ, ബാബു ആന്റണി, കലാഭവൻ ഷാജോൺ, രഞ്ജി പണിക്കർ, ശാന്തി കൃഷ്ണ, ജയപ്രകാശ്, ജെ ഡി ചക്രവർത്തി തുടങ്ങി ഒട്ടേറെ താരങ്ങൾ അഭിനയിക്കുന്നുണ്ട് . ഗോപി സുന്ദർ സംഗീതം പകർന്നിരിക്കുന്ന ഈ ചിത്രത്തിന് വേണ്ടി അദ്ദേഹം ഒരുക്കിയ പശ്ചാത്തല സംഗീതവും കിടിലനാണ്.