ഇതിഹാസമാകാൻ ലെജൻഡ് ശരവണൻ; ദി ലെജൻഡ് ട്രൈലെർ കാണാം

ഒരുപിടി പരസ്യങ്ങളിലൂടെ ശ്രദ്ധേയനായ ബിസിനസ്സ്മാൻ ലെജൻഡ് ശരവണൻ ആദ്യമായി നായകനായെത്തുന്ന ചിത്രമാണ് ദി ലെജൻഡ്. ജെ ഡി ആൻഡ് ജെറി എന്നീ സംവിധായകർ ചേർന്നൊരുക്കിയ ഈ ചിത്രം നിർമ്മിച്ചിരിക്കുന്നതും നായകനായ ലെജൻഡ് ശരവണൻ തന്നെയാണ്. ഇതിന്റെ ടീസർ, ഇതിലെ ഗാനങ്ങൾ എന്നിവ നേരത്തെ തന്നെ പുറത്ത് വരികയും വലിയ പ്രേക്ഷക ശ്രദ്ധ നേടുകയും ചെയ്തിരുന്നു. ഇപ്പോഴിതാ ഈ ചിത്രത്തിന്റെ ട്രൈലെർ റിലീസ് ചെയ്തിരിക്കുകയാണ്. തിങ്ക് മ്യൂസിക് ഇന്ത്യയുടെ യൂട്യൂബ് ചാനലിൽ റിലീസ് ചെയ്ത ഈ ട്രെയിലറിന് ഇതിനോടകം പതിനാറു മണിക്കൂർ കൊണ്ട് 36 ലക്ഷത്തോളം കാഴ്ചക്കാരെ ലഭിച്ചു കഴിഞ്ഞു. ഈ ചിത്രത്തിന് ക്യാമറ ചലിപ്പിച്ചത് പി വേൽരാജ്, എഡിറ്റ് ചെയ്തിരിക്കുന്നത് റൂബൻ എന്നിവരാണ്. രാജു സുന്ദരം, ബ്രിന്ദ മാസ്റ്റർ, ദിനേശ് മാസ്റ്റർ എന്നിവർ നൃത്ത സംവിധാനം നിർവഹിച്ച ഈ ചിത്രത്തിന് പട്ടുകോട്ടൈ പ്രഭാകർ ആണ് സംഭാഷണങ്ങൾ രചിച്ചിരിക്കുന്നത്.

ഉർവശി റൗട്ടല്ല നായികാ വേഷം ചെയ്തിരിക്കുന്ന ഈ ചിത്രത്തിൽ പ്രഭു, വിവേക്, നാസർ, വിജയകുമാർ, കോവൈ സരള, ഗീതിക, യോഗി ബാബു എന്നിവരും വേഷമിട്ടിരിക്കുന്നു. സയൻസ് ഫിക്ഷന് പ്രാധാന്യമുള്ള രീതിയിലാണ് ഈ ചിത്രം ഒരുക്കിയിരിക്കുന്നത്. എന്നാൽ അതിനൊപ്പം തന്നെ എല്ലാവിധ കൊമേർഷ്യൽ ചേരുവകളും ഇതിലുണ്ടെന്നു ഈ ട്രൈലെർ കാണിച്ചു തരുന്നു. ആക്ഷനും കോമേഡിയും പ്രണയവും നൃത്തവുമെല്ലാം ഉൾപ്പെടുത്തിയ ഒരു മാസ്സ് എന്റെർറ്റൈനെർ തന്നെയാണ് ദി ലെജൻഡ് എന്നാണു ട്രൈലെർ സൂചിപ്പിക്കുന്നത്. ഹാരിസ് ജയരാജ് സംഗീതമൊരുക്കിയ ഈ ചിത്രത്തിലെ മോസലോ മൊസല് എന്ന ഗാനത്തിന്റെ വീഡിയോ സൂപ്പർ ഹിറ്റായി മാറിയിരുന്നു.