ഗ്ലാമർ നൃത്തവുമായി തമന്ന; ഘാനിയിലെ ഗാനത്തിന് റെക്കോർഡ് കാഴ്ചക്കാർ; വീഡിയോ കാണാം..!

പുഷ്പ എന്ന ചിത്രത്തിലെ ഗ്ലാമർ നൃത്തവുമായി പ്രശസ്ത നടി സാമന്ത യൂട്യൂബിൽ റെക്കോർഡുകൾ സൃഷ്ടിച്ചതിനു പിന്നാലെ, ഇപ്പോഴിതാ പ്രശസ്ത തെന്നിന്ത്യൻ നടി തമന്നയും തന്റെ ഗ്ലാമർ നൃത്തവുമായി ട്രെൻഡിങ് ആവുകയാണ്. ഘാനി എന്ന തെലുങ്കു ചിത്രത്തിന് വേണ്ടിയാണു തമന്നയുടെ ഗ്ലാമർ നൃത്തം. കൊടുത്തെ എന്ന വരികളോടെ തുടങ്ങുന്ന ഈ ഗാനത്തിന്റെ ലിറിക്കൽ വീഡിയോ ആണ് ഇപ്പോൾ പുറത്തു വന്നിരിക്കുന്നത്. അതിൽ തമന്നയുടെ നൃത്തവും അതിന്റെ മേക്കിങ് വീഡിയോ കൂടി ഉൾപ്പെടുത്തിയിട്ടുണ്ട്. ഹാരിക നാരായൺ പാടിയ ഈ ഗാനത്തിന് സംഗീതം പകർന്നിരിക്കുന്നത് തമൻ എസ് ആണ്. രംജോഗയ്യ ശാസ്ത്രി ആണ് ഈ ഗാനത്തിന് വേണ്ടസി വരികൾ രചിച്ചിരിക്കുന്നത്. പ്രശസ്ത താരം വരുൺ തേജ് നായകനായി എത്തുന്ന ഈ ചിത്രം ബോക്സിങ് അടിസ്ഥാനമാക്കി ഒരുക്കിയ ഒരു സ്പോർട്സ് ഡ്രാമ ആണ്.

കിരൺ കൊറപറ്റി രചിച്ചു സംവിധാനം ചെയ്തിരിക്കുന്ന ഈ ചിത്രം നിർമ്മിച്ചിരിക്കുന്നത് റിനൈസ്സൻസ് പിക്ചേഴ്സ്, അല്ലു ബോബി കമ്പനി എന്നിവയുടെ ബാനറിൽ സിദ്ധു മുദ്ദ, അല്ലു ബോബി എന്നിവർ ചേർന്നാണ്. ഈ വർഷം മാർച്ചിൽ ആണ് ഈ ചിത്രം റിലീസ് ചെയ്യാൻ പ്ലാൻ ചെയ്തിരിക്കുന്നത്. ജഗപതി ബാബു, സെയീ മഞ്ജരേക്കർ, സുനിൽ ഷെട്ടി, ഉപേന്ദ്ര, നവീൻ ചന്ദ്ര, നദിയ, നരേഷ്, തനിക്കെല്ലാ ഭരണി എന്നിവരും ഈ ചിത്രത്തിന്റെ താരനിരയിൽ ഉണ്ട്. ജോർജ് സി വില്യംസ് ഛായാഗ്രഹണം നിർവഹിച്ച ഈ ചിത്രം എഡിറ്റ് ചെയ്തിരിക്കുന്നത് മാർത്താണ്ട് കെ വെങ്കടേഷ് ആണ്. ഏതായാലും തമന്നയുടെ മാദക നൃത്തവുമായി എത്തുന്ന കൊടുത്തെ എന്ന ഈ ഗാനം ഇതിനോടകം ഇരുപതു ലക്ഷത്തോളം കാഴ്ചക്കാരെ നേടിക്കഴിഞ്ഞു.