പാപ്പൻ പൂർത്തിയായി; എത്തുന്നത് ജോഷി- സുരേഷ് ഗോപി ടീമിന്റെ മറ്റൊരു തീപ്പൊരി ചിത്രം..!

മലയാളത്തിന്റെ ആക്ഷൻ സൂപ്പർ സ്റ്റാർ സുരേഷ് ഗോപിയെ നായകനാക്കി ജോഷി ഒരുക്കുന്ന പുതിയ ചിത്രമാണ് പാപ്പൻ. കഴിഞ്ഞ ദിവസമാണ് ഈ ചിത്രത്തിന്റെ ഷൂട്ടിംഗ് പൂർത്തിയായത്. ഈ വർഷം ഈദ് റിലീസ് ആയി പാപ്പൻ പ്രേക്ഷകരുടെ മുന്നിലെത്തുമെന്നാണ് പ്രതീക്ഷിക്കപ്പെടുന്നത്. ഒരു മാസ്സ് ക്രൈം ത്രില്ലർ ആയാണ് പാപ്പൻ ഒരുക്കിയിരിക്കുന്നത് എന്നുള്ള റിപ്പോർട്ടുകൾ ആണ് വരുന്നത്. ഭൂപതി, ലേലം, വാഴുന്നോർ, പത്രം, എന്നിവയാണ് സുരേഷ് ഗോപിയെ നായകനാക്കി ജോഷി ഒരുക്കിയ ചിത്രങ്ങൾ. അത് കൂടാതെ മൾട്ടിസ്റ്റാർ ചിത്രങ്ങളായ സലാം കാശ്മീർ, ക്രിസ്ത്യൻ ബ്രദേഴ്‌സ്, ട്വന്റി ട്വന്റി, ധ്രുവം എന്നീ ജോഷി ചിത്രങ്ങളിലും സുരേഷ് ഗോപി നിർണ്ണായക വേഷങ്ങൾ ചെയ്തിട്ടുണ്ട്. കൂടുതലും തീപ്പൊരി ചിത്രങ്ങൾ നമ്മുക്ക് സമ്മാനിച്ച ഈ കൂട്ടുകെട്ടിലുള്ള പ്രേക്ഷക പ്രതീക്ഷകൾ വളരെ വലുതാണ്. ഏതാനും ദിവസം മുൻപ് റിലീസ് ചെയ്ത ഇതിന്റെ മോഷൻ പോസ്റ്റർ വലിയ ശ്രദ്ധ നേടിയിരുന്നു.

പാലായിലായിരുന്നു ഈ ചിത്രത്തിന്റെ  അവസാന ഷെഡ്യൂൾ നടന്നത്. സൂപ്പർ ഹിറ്റായ പൊറിഞ്ചു മറിയം ജോസിന് ശേഷം ജോഷി ഒരുക്കുന്ന പാപ്പൻ സുരേഷ് ഗോപിയുടെ കരിയറിലെ 252-ാമത്തെ സിനിമയാണ്. എബ്രഹാം മാത്യു മാത്തൻ എന്ന കഥാപാത്രമായാണ് സുരേഷ് ഗോപി ഈ ചിത്രത്തിൽ എത്തുന്നത്. അദ്ദേഹത്തോടൊപ്പം സണ്ണി വെയ്ൻ, നൈല ഉഷ, നീത പിള്ളൈ, ഗോകുൽ സുരേഷ് ഗോപി, ആശ ശരത്, കനിഹ, മാളവിക മേനോൻ, വിജയ രാഘവൻ, ടിനി ടോം, ഷമ്മി തിലകൻ, ശ്രീജിത്ത് രവി, മാല പാർവതി, സാധിക വേണുഗോപാൽ, അഭിഷേക് രവീന്ദ്രൻ, ചന്ദുനാഥ്, ഡയാന ഹമീദ്, ജുവൽ മേരി എന്നിവരും ഈ ചിത്രത്തിൽ അഭിനയിക്കുന്നുണ്ട്. ഡേവിഡ് കാച്ചപ്പിള്ളി പ്രൊഡക്ഷൻസിന്റെയും ഇഫാർ മീഡിയയുടെയും ബാനറിൽ ഡേവിഡ് കാച്ചപ്പിള്ളിയും റാഫി മതിരയും ചേർന്ന് നിർമ്മിക്കുന്ന ഈ ചിത്രത്തിന്റെ തിരക്കഥയൊരുക്കിയത് ആർജെ ഷാനാണ്. ശ്യാം ശശിധരൻ എഡിറ്റ് ചെയ്യന്ന ഈ ചിത്രത്തിന് കാമറ ചലിപ്പിച്ചത് അജയ് ഡേവിഡ് കാച്ചപ്പിള്ളിയും സംഗീതം ഒരുക്കിയത് ജേക്സ് ബിജോയിയുമാണ്.