ജെല്ലിക്കെട്ട് കാളകളോടേറ്റുമുട്ടി സൂര്യ; വാടിവാസല്‍ ടെസ്റ്റ് ഷൂട്ട് ടീസര്‍ കാണാം

തെന്നിന്ത്യൻ സിനിമാ പ്രേമികളും സൂര്യ ആരാധകരും ഏറെ കാത്തിരിക്കുന്ന ചിത്രമാണ്, സൂര്യയെ നായകനാക്കി സൂപ്പർഹിറ്റ് തമിഴ് സംവിധായകൻ വെട്രിമാരൻ ഒരുക്കുന്ന വാടിവാസൽ. ജെല്ലിക്കെട്ടിന്റെ പശ്ചാത്തലത്തിലൊരുങ്ങുന്ന ഈ ചിത്രത്തിന് വേണ്ടി ഏറെ പ്രതീക്ഷകളോടെയാണ് ഓരോരുത്തരും കാത്തിരിക്കുന്നത്. ഈ ചിത്രം അതിന്റെ ജോലികളുടെ പ്രാരംഭ ഘട്ടത്തിലാണെന്നും, അതിന്റെ ഭാഗമായി തങ്ങൾ 2 ദിവസത്തെ ടെസ്റ്റ് ഷൂട്ട് നടത്തി നോക്കിയെന്നും ബിഹൈൻഡ് വുഡ്‌സ് അവാർഡ്‌സ് വേദിയിൽ പുരസ്‍കാരം സ്വീകരിക്കാൻ എത്തിയപ്പോൾ വെട്രിമാരൻ പറഞ്ഞിരുന്നു. ഇപ്പോഴിതാ, കഴിഞ്ഞ ദിവസം ജന്മദിനമാഘോഷിച്ച സൂര്യക്ക് ആശംസകൾ നേർന്നു കൊണ്ട് ആ ടെസ്റ്റ് ഷൂട്ട് വീഡിയോ റിലീസ് ചെയ്തിരിക്കുകയാണ് ചിത്രത്തിന്റെ അണിയറ പ്രവർത്തകർ. ഒരു മിനിറ്റും നാല് സെക്കന്റും ദൈര്‍ഘ്യമുള്ള ആ വീഡിയോ ഇപ്പോൾ സോഷ്യൽ മീഡിയയിൽ വൈറലാണ്.

രണ്ട് ജെല്ലിക്കെട്ട് കാളകളെ സ്വന്തമായി വാങ്ങി സൂര്യ ഇപ്പോൾ പരിശീലനം നടത്തുകയാണ്. കാളയുമായുള്ള സംഘട്ടനങ്ങൾ പരിചയമാകുന്നതിനായി ആണ് ഈ പരിശീലനം. തന്റെ വീട്ടിൽ നിർത്തിയാണ് സൂര്യ ആ കാളകളെ പരിപാലിക്കുന്നതും, അതുപോലെ ജെല്ലിക്കെട്ടിൽ പരിചയസമ്പന്നരായ ആളുകളുടെ സഹായത്തോടെ പരിശീലിക്കുന്നതുമെന്നും വെട്രിമാരൻ വെളിപ്പെടുത്തിയിരുന്നു. വെട്രിമാരൻ ഒരുക്കിയ അസുരൻ, കർണ്ണൻ തുടങ്ങി ഒട്ടേറെ വമ്പൻ ചിത്രങ്ങൾ നിർമ്മിച്ച കലൈപുലി എസ് താണു ആണ് ഈ ബിഗ് ബഡ്ജറ്റ് ചിത്രം നിർമ്മിക്കാൻ പോകുന്നത്. ജെല്ലിക്കെട്ട് പശ്ചാത്തലമായ, സി.എസ്. ചെല്ലപ്പയുടെ ഇതേപേരിലുള്ള നോവലിനെ ആസ്പദമാക്കിയുള്ളതാണ് ഈ ചിത്രം. വളരെ വെല്ലുവിളി നിറഞ്ഞ ഒരു പ്രമേയമാണ് ഈ ചിത്രം ചർച്ച ചെയ്യുന്നതെന്നും വെട്രിമാരൻ പറഞ്ഞിരുന്നു. ഇപ്പോൾ ബാല സംവിധാനം ചെയ്യുന്ന വണങ്കാന്‍ എന്ന ചിത്രമാണ് സൂര്യ ചെയ്തു കൊണ്ടിരിക്കുന്നത്.