സണ്ണി വെയ്‌ന്റെ ആദ്യ തമിഴ് ചിത്രം; ജീവ നായകനാവുന്ന ജിപ്സിയുടെ ട്രൈലെർ എത്തി

മലയാളത്തിന്റെ പ്രിയ യുവ താരം സണ്ണി വെയ്ൻ ആദ്യമായി തമിഴിൽ അഭിനയിച്ച ചിത്രമാണ് ജിപ്സി. പ്രശസ്ത തമിഴ് യുവ താരം ജീവ നായക വേഷം ചെയ്ത ഈ ചിത്രത്തിന്റെ ട്രൈലെർ ഇന്ന് റിലീസ് ചെയ്തു കഴിഞ്ഞു. ഇവർക്കൊപ്പം നടാഷ സിങ്, ലാൽ ജോസ്, സുശീല രാമൻ, വിക്രാന്ത് സിങ്, കരുണ പ്രസാദ് എന്നിവരും ഈ ചിത്രത്തിൽ അഭിനയിക്കുന്നുണ്ട്. രാജു മുരുകൻ സംവിധാനം ചെയ്ത ഈ ചിത്രം നിർമ്മിച്ചിരിക്കുന്നത് ഒളിമ്പിയ മൂവീസിന്റെ ബാനറിൽ എസ് അംബേദ് കുമാർ ആണ്. പ്രണയവും വൈകാരിക മുഹൂർത്തങ്ങളും ആക്ഷനുമെല്ലാം നിറഞ്ഞ ഈ ചിത്രം സാമൂഹിക പ്രസക്തിയുള്ള ഒരു കഥ കൂടി പറയുന്നുണ്ട് എന്ന സൂചനയാണ് ഇതിന്റെ ട്രൈലെർ നമ്മുക്ക് നൽകുന്നത്. ജീവ വ്യത്യസ്ത ലുക്കിൽ എത്തുന്ന ഈ ചിത്രത്തിൽ മാസ്സ് ലുക്കിലാണ് സണ്ണി വെയ്‌നും അഭിനയിച്ചിരിക്കുന്നത്.

സന്തോഷ് നാരായണൻ സംഗീത സംവിധാനം നിർവഹിച്ച ഈ ചിത്രത്തിന് ക്യാമറ ചലിപ്പിച്ചിരിക്കുന്നതു സെൽവ കുമാർ എസ് കെ ആണ്. റെയ്മണ്ട് ഡെറിക് ക്രസ്റ്റായാണ് ഈ ചിത്രത്തിന്റെ എഡിറ്റിംഗ് നിർവഹിച്ചിരിക്കുന്നതു. ഇതിലെ ഗാനങ്ങളും റിലീസ് ചെയ്തിട്ടുണ്ട്. ഈ ചിത്രത്തിലെ പല ഗാനങ്ങളും ഇപ്പോൾ തന്നെ വലിയ രീതിയിൽ പ്രേക്ഷക ശ്രദ്ധയാകർഷിക്കുന്നുണ്ട്. അധികം വൈകാതെ റിലീസ് ചെയ്യാൻ പോകുന്ന ഈ ചിത്രം ജീവയുടെ അഭിനയ ജീവിതത്തിലെ ഒരു വഴിത്തിരിവാകും എന്നാണ് സൂചന. അതുപോലെ സണ്ണി വെയ്ൻ എന്ന നടന് തമിഴ് സിനിമയിൽ ഒരു മികച്ച എൻട്രി കൂടി ഈ ചിത്രം നൽകുമെന്നും പ്രേക്ഷകർ പ്രതീക്ഷിക്കുന്നു. സണ്ണി വെയ്ൻ നായകനായ അനുഗ്രഹീതൻ ആന്റണി എന്ന മലയാള ചിത്രവും റിലീസിന് ഒരുങ്ങുകയാണ്.