ആരാധകർ ആവേശത്തോടെ കാത്തിരിക്കുന്ന ദളപതി- മക്കൾ സെൽവൻ പോരാട്ടം; മാസ്റ്ററിന്റെ ചിത്രീകരണം പൂർത്തിയായി

കൈദി എന്ന ബ്ലോക്ക്ബസ്റ്റർ കാർത്തി ചിത്രത്തിന് ശേഷം ലോകേഷ് കനകരാജ് സംവിധാനം ചെയ്ത മാസ്റ്റർ എന്ന ചിത്രത്തിന്റെ ഷൂട്ടിംഗ് ഇന്ന് അവസാനിച്ചു. ദളപതി വിജയ്, മക്കൾ സെൽവൻ വിജയ് സേതുപതി എന്നിവർ കേന്ദ്ര കഥാപാത്രങ്ങളായി എത്തുന്ന ഈ ചിത്രം ഏപ്രിൽ ഒൻപതിന് ആണ് റിലീസ് ചെയ്യാൻ പോകുന്നത്. ഈ ചിത്രത്തിന്റെ ഷൂട്ടിങ്ങിനിടെ വിജയുടെ വീട്ടിൽ നടന്ന ആദായ നികുതി വകുപ്പിന്റെ റെയ്‌ഡും അതിനെ തുടർന്ന് ബി ജെ പി പ്രവർത്തകർ ഈ ചിത്രത്തിന്റെ ഷൂട്ടിംഗ് തടയാൻ ശ്രമിച്ചതുമെല്ലാം ഇതിനു വലിയ വാർത്ത പ്രാധാന്യം നേടിക്കൊടുത്തിരുന്നു. വിജയ്- വിജയ് സേതുപതി ടീം ആദ്യമായി ഒന്നിക്കുന്നു എന്നതും അതുപോലെ ലോകേഷ് കനകരാജ് ഈ ചിത്രം സംവിധാനം ചെയ്യുന്നു എന്നതുമാണ് ഇതിന്റെ ഏറ്റവും വലിയ ഹൈലൈറ്റുകൾ. ഇന്നിപ്പോൾ ഷൂട്ടിംഗ് പാക്ക് അപ് ആയതിനൊപ്പം മക്കൾ സെൽവൻ വിജയ് സേതുപതി ദളപതി വിജയ്ക്ക് ഒരു മുത്തം നൽകുന്ന ഫോട്ടോയും സോഷ്യൽ മീഡിയയിൽ വൈറലാവുകയാണ്.

സംവിധായകനും രത്ന കുമാറും ചേർന്ന് രചിച്ചിരിക്കുന്ന ഈ ചിത്രം നിർമ്മിക്കുന്നത് എക്സ് ബി ഫിലിം ക്രിയേറ്റേഴ്സ് എന്ന ബാനറിൽ സേവ്യർ ബ്രിട്ടോ ആണ്. ശന്തനു ഭാഗ്യരാജ്, മാളവിക മോഹനൻ, ഗൗരി കിഷൻ, അർജുൻ ദാസ്, ആൻഡ്രിയ, ശ്രീമാൻ, പ്രേം, സഞ്ജീവ്, ശ്രീനാഥ്, രമ്യ സുബ്രമണ്യൻ, രമേശ് തിലക് എന്നിവരും ഈ ചിത്രത്തിന്റെ താരനിരയിലുണ്ട്. അനിരുദ്ധ് രവിചന്ദർ സംഗീത സംവിധാനം നിർവഹിച്ച ഈ ചിത്രത്തിലെ കുട്ടി സ്റ്റോറി എന്ന ഗാനം ഇപ്പോഴേ സൂപ്പർ ഹിറ്റാണ്. ദളപതി വിജയ് തന്നെയാണ് ആ ഗാനം ആലപിച്ചിരിക്കുന്നത്. ഈ ചിത്രത്തിന് ക്യാമറ ചലിപ്പിച്ചിരിക്കുന്നതു സത്യൻ സൂര്യനും എഡിറ്റ് ചെയ്യുന്നത് ഫിലോമിൻ രാജുമാണ്.