ഇത് വേറെ ലെവൽ; ലോക്ക്ഡൌൺ കാലത്തു തമിഴ് സിനിമയിലെ സ്റ്റണ്ട് മാസ്റ്റേഴ്സ് ഒരുക്കിയ തകർപ്പൻ ആക്ഷൻ രംഗം സോഷ്യൽ മീഡിയയിൽ വൈറൽ..!

മാർച്ച് മാസം മുതൽ ഇന്ത്യ ലോക്ക് ഡൗണിലായതോടെ ഇന്ത്യൻ സിനിമാ രംഗവും പൂർണ്ണമായും നിശ്ചലമായി. കഴിഞ്ഞ കുറച്ചു ദിവസങ്ങളായി ലോക്ക് ഡൗണിൽ ഇളവുകൾ വന്നതോടെ ചില വമ്പൻ തമിഴ് സിനിമകളുടെ പോസ്റ്റ്- പ്രൊഡക്ഷൻ ചെറിയ രീതിയിൽ ആരംഭിച്ചെന്നു വാർത്തകൾ വന്നിരുന്നു. അതുപോലെ പല സിനിമാ ഇൻഡസ്ട്രികളിലും ചെറിയ രീതിയിൽ പ്രീ- പ്രൊഡക്ഷൻ, പോസ്റ്റ്- പ്രൊഡക്ഷൻ ജോലികൾ ആരംഭിക്കാനുള്ള പ്ലാനിലാണ് സിനിമാ പ്രവർത്തകർ. എന്നാൽ ലോക്ക് ഡൗണിൽ ആയിരുന്നപ്പോഴും പലരും സൃഷ്ടിപരമായ രീതിയിൽ സോഷ്യൽ മീഡിയയിൽ ആക്റ്റീവ് ആയിരുന്നു. കോവിഡ് 19 ബോധവൽക്കരണത്തിനായി ഇന്ത്യൻ സിനിമയിലെ സൂപ്പർ താരങ്ങൾ ഒരുമിച്ചു അഭിനയിച്ച ഹൃസ്വ ചിത്രം വൈറൽ ആയിരുന്നു. എല്ലാവരും അവരവരുടെ വീട് വിട്ടു പുറത്തു വരാതെയാണ് അത് ചിത്രീകരിച്ചത്.

ഇപ്പോഴിതാ തമിഴ് സിനിമയിലെ സ്റ്റണ്ട് മാസ്റ്റർമാരും സ്റ്റണ്ട് കലാകാരന്മാരും സമാനമായ രീതിയിൽ ഒരുക്കിയ ഒരു കിടിലൻ സംഘട്ടന രംഗം സോഷ്യൽ മീഡിയയിൽ തരംഗമാവുകയാണ്. സ്റ്റണ്ട് മാസ്റ്റർ ദിനേശ് ആണ് ഈ സംഘട്ടന രംഗം ഒരുക്കിയിരിക്കുന്നത്. നമ്മൾ ഇതിനോടകം തമിഴ് സിനിമയിൽ കണ്ടു പരിചയിച്ച ഒട്ടേറെ സ്റ്റണ്ട് കലാകാരന്മാരെ ഈ തകർപ്പൻ സംഘട്ടന രംഗത്തിൽ കാണാം. സാമൂഹിക അകലം പാലിച്ചു കൊണ്ട് തന്നെ ഓരോരുത്തരും അഭിനയിച്ചിരിക്കുന്ന ഈ സംഘട്ടന രംഗത്തിന് രണ്ടു മിനിറ്റിൽ കൂടുതൽ ദൈർഖ്യമുണ്ട്. ഏറ്റവുമാവസാനം മാസ്‌ക് ഉപയോഗിക്കേണ്ടതിന്റെയും അതുപോലെ കൈകൾ വൃത്തിയായി സൂക്ഷിക്കേണ്ടതിന്റെയും ആവശ്യകത കാണിച്ചു തരുന്ന ഒരു ഷോട്ടിലൂടെയാണ് ഈ സംഘട്ടന രംഗമവസാനിപ്പിച്ചിരിക്കുന്നത് എന്നതും ശ്രദ്ധേയമാണ്. രാകേഷ് റോക്കി എന്നൊരു കലാകാരനാണ് ഈ സംഘട്ടന രംഗം മനോഹരമായ രീതിയിൽ എഡിറ്റ് ചെയ്തിരിക്കുന്നത്.