ഇത് വേറെ ലെവൽ; രാജമൗലി ചിത്രത്തിന്റെ പുതിയ ടീസർ വീഡിയോ കാണാം..!

ബാഹുബലി സീരിസിന് ശേഷം എസ് എസ് രാജമൗലി ഒരുക്കിയ ബ്രഹ്മാണ്ഡ ചിത്രമാണ് ആർ ആർ ആർ. ഇന്ത്യൻ സിനിമയിലെ ഏറ്റവും വലിയ ചിത്രങ്ങളിൽ ഒന്നായി നിർമ്മിച്ച ഈ സിനിമ അടുത്ത വർഷം ജനുവരി ഏഴിന് ആണ് റിലീസ് ചെയ്യുക. ഒന്നിലധികം ഭാഷകളിൽ ആയി ആഗോള റിലീസായി എത്തുന്ന ഈ ചിത്രം, ഇന്ത്യൻ സിനിമാ പ്രേമികൾ ഏറ്റവും കൂടുതൽ കാത്തിരിക്കുന്ന ഒന്നാണ്. ഇതിന്റെ പോസ്റ്ററുകൾ, ടീസറുകൾ, പ്രൊമോഷൻ ഗാനങ്ങൾ എന്നിവ ഇതിനോടകം സൂപ്പർ ഹിറ്റായിട്ടുണ്ട്. ഇപ്പോഴിതാ ഈ ചിത്രത്തിന്റെ ഒരു പുതിയ വീഡിയോ കൂടി പ്രചരണാർത്ഥം റിലീസ് ചെയ്തിരിക്കുകയാണ്. അത് കണ്ടതോട് കൂടി ഈ സിനിമയിൽ ഉള്ള പ്രേക്ഷകരുടെ പ്രതീക്ഷ ആകാശം മുട്ടി എന്ന് തന്നെ നമ്മുക്ക് പറയാം. ഒരു ടീസർ പോലെയുള്ള വീഡിയോ ആണ് എത്തിയിരിക്കുന്നത്. ആക്ഷൻ രംഗങ്ങൾ കൊണ്ട് സമൃദ്ധമാണ് ഈ പുതിയ വീഡിയോ.

റാം ചരൺ, ജൂനിയർ എൻ ടി ആർ, ബോളിവുഡ് താരം അജയ് ദേവ്‌ഗൺ, ആലിയ ഭട്ട് എന്നിവർ പ്രധാന വേഷം ചെയ്യുന്ന ഈ ചിത്രം ഒക്ടോബറിൽ പൂജ റിലീസ് ആയി റിലീസ് ചെയ്യാൻ ആയിരുന്നു ആദായം തീരുമാനിച്ചത് എങ്കിലും, കോവിഡ് പശ്ചാത്തലത്തിൽ റിലീസ് നീട്ടുകയായിരുന്നു. ഇന്ത്യൻ സിനിമയിലെ ഏറ്റവും വലിയ ആക്ഷൻ ചിത്രമായി ആർ ആർ ആർ മാറുമെന്നാണ് ഇതിന്റെ ആദ്യം വന്ന മേക്കിങ് വീഡിയോ നമ്മുക്ക് തന്ന സൂചന. കെ വി വിജയേന്ദ്ര പ്രസാദ് എഴുതിക്കിയ കഥയ്ക്ക് എസ് എസ് രാജമൗലി തന്നെ തിരക്കഥ രചിച്ചിരിക്കുന്ന ഈ ചിത്രം നിർമ്മിക്കുന്നത് ഡി വി വി എന്റെർറ്റൈന്മെന്റ്സ് ആണ്. കെ കെ സെന്തിൽ കുമാർ കാമറ ചലിപ്പിക്കുന്ന ഈ ചിത്രം എഡിറ്റ് ചെയ്യുന്നത് ശ്രീകർ പ്രസാദ് ആണ്. ഒളിവിയ മോറിസ്, സമുദ്രക്കനി, റേ സ്റ്റീവൻസൺ, അലിസൻ ഡൂഡി, ശ്രിയ സരൺ, ഛത്രപതി ശേഖർ, രാജീവ് കനകാല എന്നിവരും അഭിനയിച്ചിരിക്കുന്ന ഈ ചിത്രത്തിന് സംഗീതം ഒരുക്കിയത് കീരവാണി ആണ്. ഇന്ത്യൻ സ്വാതന്ത്ര്യ സമരത്തിന്റെ പശ്ചാത്തലത്തിലാണ് ഈ ചിത്രം ഒരുങ്ങിയിരിക്കുന്നത്. കോമരം ഭീം ആയി ജൂനിയർ എൻ ടി ആർ അഭിനയിച്ചപ്പോൾ അല്ലൂരി സീതാരാമ രാജു ആയാണ് റാം ചരൺ വേഷമിട്ടത്.