അറബിക് കുത്തിന് ചുവട് വെച്ചു രൻവീർ സിങ്; ചുവടുകൾ പഠിപ്പിച്ചു അനിരുദ്ധ്; വീഡിയോ കാണാം

ദളപതി വിജയ് നായകനായെത്തിയ ഏറ്റവും പുതിയ ചിത്രമായ ബീസ്റ്റിലെ അറബിക് കുത്ത് എന്ന ഗാനം സോഷ്യൽ മീഡിയയിൽ തരംഗമായി മാറിയിരുന്നു. അറബിക് സ്റ്റൈൽ മ്യൂസിക്, വരികൾ എന്നിവക്കൊപ്പം തമിഴ് ബീറ്റുകൾ മിക്സ് ചെയ്തുകൊണ്ട്, സംഗീത സംവിധായകൻ അനിരുദ്ധ് രവിചന്ദർ ഒരുക്കിയ ഈ ഗാനം അനിരുദ്ധ് രവിചന്ദർ, ജോണിത ഗാന്ധി എന്നിവർ ചേർന്നാണ് പാടിയിരിക്കുന്നത്. തമിഴിലെ യുവ താരം ശിവകാർത്തികേയൻ വരികൾ രചിച്ചിരിക്കുന്ന ഈ ഗാനത്തിന്റെ ഹൈലൈറ്റ്, ദളപതിയുടെ കിടിലൻ നൃത്തവും അതുപോലെ നായികാ വേഷം ചെയ്ത പൂജ ഹെഗ്‌ഡെയുടെ നൃത്ത ചുവടുകളുമാണ്. ആഗോള തലത്തിലാണ് ഈ ഗാനവും ഇതിലെ നൃത്ത ചുവടുകളും സൂപ്പർ ഹിറ്റായത്.

https://youtube.com/shorts/g3ljh6m6vlo

ഇന്ത്യൻ സിനിമാ രംഗത്തെ വിവിധ ഇന്ഡസ്ട്രികളിലെ സെലിബ്രിറ്റികളുൾപ്പെടെ ഈ ഗാനത്തിന് നൃത്തം ചെയ്യുന്ന വീഡിയോകൾ പങ്കു വെക്കുന്നത് ഇതിനോടകം സോഷ്യൽ മീഡിയയിൽ നമ്മൾ ഒരുപാട് കണ്ടു കഴിഞ്ഞു. ഇപ്പോഴിതാ ബോളിവുഡ് സൂപ്പർ താരം രൻവീർ സിങ് ഈ ഗാനത്തിന് ചുവടുവെക്കുന്ന വിഡിയോയാണ് വൈറലാവുന്നത്. ഗോൾഡൻ ഗലാട്ട ക്രൗണ് 2022 പരിപാടിയിൽ വെച്ചാണ് ഈ ഗാനത്തിന് രൻവീർ സിങ് ചുവടു വെച്ചത്. രൻവീർ സിങ്ങിന് ഈ ഗാനത്തിന്റെ ചുവടുകൾ വേദിയിൽ വെച്ചു തന്നെ പഠിപ്പിച്ചു കൊടുത്തത് അനിരുദ്ധ് രവിചന്ദരാണ്. ബോളിവുഡിലെ ഏറ്റവും മികച്ച നർത്തകരിൽ ഒരാളാണ് രൻവീർ സിങ്. നെൽസൺ ദിലീപ്കുമാർ രചിച്ചു സംവിധാനം ചെയ്ത ബീസ്റ്റ് സൺ പിക്ചേഴ്സ് ആണ് നിർമ്മിച്ചത്. യോഗി ബാബു, ഷൈൻ ടോം ചാക്കോ, വിടിവി ഗണേഷ്, അപർണ്ണ ദാസ്, പുകഴ് എന്നിവരും ഈ ചിത്രത്തിന്റെ താരനിരയിലുണ്ട്.