ഹോട്ട് ഗ്ലാമറസ് ലുക്കിൽ ശ്രദ്ധ കപൂറും രൺബീർ കപൂറും; തൂ ജൂട്ടി മേം മക്കാർ ട്രൈലെർ കാണാം

ബോളിവുഡിലെ സൂപ്പർ നായകനും നായികയുമായ രൺബീർ കപൂർ, ശ്രദ്ധ കപൂർ എന്നിവർ ഒന്നിച്ചെത്തുന്ന ഏറ്റവും പുതിയ ചിത്രമാണ് തൂ ജൂട്ടി മേം മക്കാർ. ഇപ്പോഴിതാ ഈ ചിത്രത്തിന്റെ ട്രൈലെർ റിലീസ് ചെയ്തിരിക്കുകയാണ്. ഏറെ രസകരമായ ഒരു റൊമാന്റിക് കോമഡി ചിത്രമായിരിക്കും ഇതെന്ന സൂചനയാണ് ഈ ട്രൈലെർ നമ്മുക്ക് നൽകുന്നത്. വളരെ ഹോട്ട് ഗ്ലാമറസ് ലുക്കിലാണ് ഇതിൽ ശ്രദ്ധ കപൂർ പ്രത്യക്ഷപ്പെടുന്നത്. ട്രെയ്ലറിൽ കണ്ട ശ്രദ്ധയുടെ ഗ്ലാമറസ് രംഗങ്ങൾ ഇപ്പോൾ തന്നെ സോഷ്യൽ മീഡിയയിൽ വൈറലായിക്കഴിഞ്ഞു. ലവ് രഞ്ജൻ സംവിധാനം ചെയ്തിരിക്കുന്ന ഈ ചിത്രം, ബ്രഹ്മാസ്ത്ര എന്ന സൂപ്പർ ഹിറ്റിനു ശേഷം റിലീസ് ചെയ്യാൻ പോകുന്ന രൺബീർ കപൂർ ചിത്രം കൂടിയാണ്. രൺബീർ കപൂർ, ശ്രദ്ധ കപൂർ എന്നിവർ ആദ്യമായി ഒന്നിച്ചെത്തുന്ന ചിത്രമാണിതെന്നതും ഇതിന്റെ പ്രത്യേകതയാണ്.

ഈ വരുന്ന മാർച്ച് മാസം എട്ടിനാണ് തൂ ജൂട്ടി മേം മക്കാർ ആഗോള റിലീസായി എത്തുന്നത്. രൺബീർ- ശ്രദ്ധ ജോഡിയുടെ ചുംബന രംഗം കാണിച്ചു കൊണ്ടാണ് മൂന്ന് മിനിറ്റോളം ദൈർഘ്യമുള്ള ഇതിന്റെ ട്രൈലെർ ആരംഭിക്കുന്നത് തന്നെ. ഇന്നത്തെ കാലത്തേ ഒരു ടൈം പാസ് പ്രണയം വിവാഹത്തിലേക്ക് എത്തുന്നതും പിന്നീട് നടക്കുന്ന രസകരമായ സംഭവങ്ങളുമാണ് ഈ ചിത്രത്തിന്റെ പ്രമേയമെന്ന് ട്രൈലെർ സൂചിപ്പിക്കുന്നു. ടി സീരിസ്, ലവ് ഫിലിംസ് എന്നിവർ ചേർന്ന് നിർമ്മിക്കുന്ന ഈ ചിത്രം രചിച്ചിരിക്കുന്നത് സംവിധായകൻ തന്നെയാണ്. പ്രീതം സംഗീതമൊരുക്കിയ ഈ ചിത്രത്തിന് ക്യാമറ ചലിപ്പിച്ചത് സന്താന കൃഷ്ണൻ രവിചന്ദ്രനും എഡിറ്റ് ചെയ്തിരിക്കുന്നത് അകിവ് അലി, ചേതൻ സോളങ്കി എന്നിവരും ചേർന്നാണ്.