ലവ് ആക്ഷൻ ഡ്രാമാക്കു ശേഷം ധ്യാൻ ശ്രീനിവാസന്റെ പ്രകാശൻ പറക്കട്ടെ; പൊട്ടിച്ചിരിപ്പിക്കുന്ന ട്രൈലെർ കാണാം

പ്രശസ്ത നടനും സംവിധായകനുമായ ധ്യാൻ ശ്രീനിവാസൻ തിരക്കഥ രചിച്ച ഏറ്റവും പുതിയ ചിത്രമാണ് പ്രകാശൻ പറക്കട്ടെ. ഇതിന്റെ ടീസർ, ഇതിലെ ഒരു ഗാനം എന്നിവയെല്ലാം നേരത്തെ തന്നെ പുറത്തുവന്നു സൂപ്പർ ഹിറ്റായി മാറിയിരുന്നു. ഇപ്പോഴിതാ ഈ ചിത്രത്തിന്റെ അതീവ രസകരമായ ട്രൈലെർ റിലീസ് ചെയ്തിരിക്കുകയാണ്. ആദ്യാവസാനം പ്രേക്ഷകരെ പൊട്ടിച്ചിരിപ്പിക്കുന്ന ഒരു ചിരിവിരുന്നു തന്നെയാവും ഈ ചിത്രമെന്ന സൂചനയാണ് ഇന്ന് റിലീസ് ചെയ്ത ഇതിന്റെ ട്രൈലെർ നമ്മുക്ക് നൽകുന്നത്. ദിലീഷ് പോത്തൻ , മാത്യു തോമസ്, അജു വർഗീസ്, സൈജു കുറുപ്പ്, ധ്യാൻ ശ്രീനിവാസൻ എന്നിവരെ പ്രധാന കഥാപാത്രങ്ങളാക്കി ഷഹദ് ആണ് ഈ ചിത്രം സംവിധാനം ചെയ്തിരിക്കുന്നത്. ഈ ചിത്രത്തിലെ കണ്ണു കൊണ്ടു നുള്ളി എന്ന മനോഹരഗാനം കുറച്ചു നാൾ മുന്നേ പുറത്തു വന്നു വലിയ ശ്രദ്ധ നേടിയിരുന്നു. ഷാൻ റഹ്മാൻ ആണ് ഈ ചിത്രത്തിന് സംഗീതം പകർന്നിരിക്കുന്നത്.

പുതുമുഖം മാളവിക മനോജ് നായികാ വേഷം ചെയ്യുന്ന ഈ ചിത്രത്തിൽ ശ്രീജിത്ത് രവി, ഗോവിന്ദ് വി. പെെ, നിഷാ സാരംഗ്, സ്മിനു സിജോ എന്നിവരും, അതുപോലെ നടന്‍ ശ്രീജിത്ത് രവിയുടെ മകന്‍ മാസ്റ്റര്‍ ഋതുണ്‍ ജയ് ശ്രീജിത്ത് രവിയും അഭിനയിച്ചിരിക്കുന്നു. ജൂൺ പതിനേഴിനാണ് ഈ ചിത്രം റിലീസ് ചെയ്യാൻ പോകുന്നത്. ധ്യാന്‍ ശ്രീനിവാസന്റെ അസ്സോസിയേറ്റ് ഡയറക്ടറായിരുന്ന ഷഹദിന്റെ ആദ്യ സംവിധാന സംരംഭമാണ് പ്രകാശൻ പറക്കട്ടെ. ഹിറ്റ് മേക്കേഴ്സ് എന്റര്‍ടെെയ്മെന്റ്, ഫന്റാസ്റ്റിക് ഫിലിംസ് എന്നീ ബാനറിൽ വിശാഖ് സുബ്രഹ്മണ്യം, ടിനു തോമസ്, അജു വർഗീസ് എന്നിവർ ചേർന്ന് നിർമ്മിക്കുന്ന ഈ ചിത്രത്തിന് ക്യാമറ ചലിപ്പിച്ചത് ഗുരു പ്രസാദ്, എഡിറ്റ് ചെയ്തിരിക്കുന്നത് രതിൻ രാധാകൃഷ്ണൻ എന്നിവരാണ്.