സൗഹൃദവും പ്രണയവും ആഘോഷിച്ചു തട്ടാശ്ശേരി കൂട്ടത്തിലെ പുത്തൻ ഗാനം; വീഡിയോ കാണാം

ജനപ്രിയ നായകൻ ദിലീപ് നിർമ്മിച്ച ഏറ്റവും പുതിയ ചിത്രങ്ങളിൽ ഒന്നായ തട്ടാശ്ശേരി കൂട്ടം ഈ മാസം പ്രേക്ഷകരുടെ മുന്നിലെത്തും. ഇതിന്റെ പോസ്റ്ററുകൾ, ട്രൈലെർ എന്നിവയെല്ലാം വമ്പൻ പ്രേക്ഷക ശ്രദ്ധയാണ് നേടിയത്. ദിലീപിന്റെ സഹോദരൻ അനൂപ് ആദ്യമായി സംവിധാനം ചെയ്ത തട്ടാശ്ശേരി കൂട്ടം ഒരു പക്കാ എന്റെർറ്റൈനെർ ആണെന്ന സൂചനയാണ് ഇവയെല്ലാം നമ്മുക്ക് നൽകിയത്. ഇപ്പോഴിതാ, ഈ ചിത്രത്തിന്റെ ആദ്യ വീഡിയോ ഗാനവും റിലീസ് ചെയ്തിരിക്കുകയാണ്. പെണ്ണെ നീ പൊന്നെ നീ എന്ന വരികളോടെ തുടങ്ങുന്ന ഈ ഗാനം ഒരു കൂട്ടം ചെറുപ്പക്കാരുടെ സൗഹൃദവും പ്രണയവുമെല്ലാം ആഘോഷിക്കുന്ന ഒരു ഗാനമാണ്. സഖി എൽസ വരികൾ രചിച്ച ഈ ഗാനം ആലപിച്ചിരിക്കുന്നത് സൂരജ് സന്തോഷാണ്. രാം ശരത് ആണ് ഈ ഗാനത്തിന് ഈണം പകർന്നിരിക്കുന്നത്.

ചിരിയും പ്രണയവും ആക്ഷനും ത്രില്ലും കൂട്ടിയിണക്കി ആദ്യാവസാനം പ്രേക്ഷകരെ ഏറെ രസിപ്പിക്കുന്ന ഒരു ചിത്രമാകും ഇതെന്ന് ഈ ചിത്രത്തിന്റെ ട്രൈലെർ നമ്മുക്ക് കാണിച്ചു തന്നിരുന്നു. ഇപ്പോൾ വന്നിരിക്കുന്ന ഈ ഗാനവും അതേ ഫീലാണ് നമ്മുക്ക് തരുന്നത്. പ്രശസ്ത യുവ താരം അർജുൻ അശോകൻ നായകനായി എത്തുന്ന ഈ ചിത്രത്തിൽ അനീഷ് ഗോപാൽ, ഉണ്ണി രാജൻ പി ദേവ് , ഗണപതി എന്നിവർ പ്രധാന വേഷങ്ങൾ ചെയ്യുന്നുണ്ട്. പ്രിയംവദ കൃഷ്ണൻ, വിജയ രാഘവൻ, സിദ്ദിഖ്, അപ്പു, സുരേഷ് മേനോൻ, ഷൈനി സാറ, ശ്രീലക്ഷ്മി എന്നിവരും ഇതിൽ അഭിനയിച്ചിട്ടുണ്ട്. ഗ്രാൻഡ് പ്രൊഡക്ഷൻസിന്റെ ബാനറിൽ ദിലീപ് നിർമ്മിച്ച ഈ ചിത്രം രചിച്ചിരിക്കുന്നത് പ്രശസ്ത രചയിതാവായ സന്തോഷ് ഏച്ചിക്കാനമാണ്. ജിതിൻ സ്റ്റാൻസിലാവോസ് ഛായാഗ്രഹണം നിർവഹിച്ച ഈ ചിത്രം എഡിറ്റ് ചെയ്തത് വി സാജനും, ഇതിന്റെ കഥ രചിച്ചത് ജിയോ പിവിയുമാണ്.