തുറന്നു വിട്ടാൽ തിരിച്ചു വരുന്നവർ ചുരുക്കമാണ് സാറെ, മനുഷ്യൻ ആയാലും മൃഗമായാലും; പത്താം വളവ് ട്രൈലെർ കാണാം..!

ജോസഫ് എന്ന സൂപ്പർ ഹിറ്റ് ചിത്രത്തിന് ശേഷം എം പത്മകുമാർ സംവിധാനം ചെയ്യുന്ന പത്താംവളവ് എന്ന ത്രില്ലർ റിലീസിന് ഒരുങ്ങുകയാണ്. ഒരു മാസം മുൻപ് പുറത്തു വന്ന ഇതിന്റെ ടീസർ വലിയ പ്രേക്ഷക ശ്രദ്ധ നേടിയിരുന്നു. ഇപ്പോഴിതാ ഇതിന്റെ ട്രൈലെർ കൂടി പുറത്തു വന്നിരിക്കുകയാണ്. മികച്ച ശ്രദ്ധയാണ് ഈ ട്രൈലെർ ഇപ്പോൾ സോഷ്യൽ മീഡിയയിൽ നിന്നും നേടുന്നത്. നേരത്തെ പുറത്തു വന്ന ഇതിന്റെ പോസ്റ്ററുകളും മികച്ച പ്രേക്ഷക ശ്രദ്ധ നേടിയെടുത്തിരുന്നു. ബിഗ് ബഡ്ജറ്റിൽ ഒരുക്കിയ ഈ ചിത്രത്തിന് തിരക്കഥ രചിച്ചിരിക്കുന്നത് കഡാവർ, നൈറ്റ് ഡ്രൈവ് എന്നീ ചിത്രങ്ങൾ രചിച്ച അഭിലാഷ് പിള്ള ആണ്. പ്രശസ്ത നടന്മാരായ സുരാജ് വെഞ്ഞാറമൂട്, ഇന്ദ്രജിത്ത് സുകുമാരൻ എന്നിവരാണ് ഈ ത്രില്ലർ ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്. ത്രില്ലർ മൂഡിൽ കഥ പറയുന്ന ഈ ചിത്രത്തിൽ കുടുംബ ബന്ധങ്ങൾക്കും പ്രാധാന്യം ഉണ്ടെന്നു ഇതിന്റെ ട്രൈലെർ സൂചിപ്പിക്കുന്നു.

വർഷങ്ങൾക്കു മുമ്പ് കേരള മനസാക്ഷിയെ ഞെട്ടിച്ച ഒരു യഥാർത്ഥ സംഭവത്തെ ആസ്പദമാക്കി ആണ് ഈ ചിത്രം ഒരുക്കിയിരിക്കുന്നത് എന്നാണ് റിപ്പോർട്ടുകൾ സൂചിപ്പിക്കുന്നത്. അദിതി രവിയും സ്വാസികയും നായികമാരായി എത്തുന്ന ഈ ചിത്രം യു ജി എം പ്രൊഡക്ഷൻസിന്റെ ബാനറിൽ ഡോക്ടർ സക്കറിയ തോമസ്, ശ്രീജിത്ത് രാമചന്ദ്രൻ, ജിജോ കാവനാൽ, പ്രിൻസ് പോൾ എന്നിവർ ചേർന്നാണ് നിർമ്മിച്ചിരിക്കുന്നത്. ബോളിവുഡ് നിർമ്മാണക്കമ്പനിയായ മുംബൈ മൂവി സ്റ്റുഡിയോസ് ഈ ചിത്രത്തിന്റെ സഹനിർമ്മാതാക്കൾ ആണ്. മേല്പറഞ്ഞവരെ കൂടാതെ അജ്മൽ അമീർ, അനീഷ് ജി മേനോൻ, സുധീർ കരമന, സോഹൻ സീനു ലാൽ, മേജർ രവി, രാജേഷ് ശർമ്മ, ഇടവേള ബാബു, നന്ദൻ ഉണ്ണി, ജയകൃഷ്ണൻ,ഷാജു ശ്രീധർ, നിസ്‌താർ അഹമ്മദ്‌, തുഷാര പിള്ള, അമ്പിളി തുടങ്ങിയവരും ഇതിന്റെ താരനിരയിൽ ഉണ്ട്. ഈ ചിത്രത്തിന് കാമറ ചലിപ്പിച്ചത് രതീഷ് റാമും, സംഗീതമൊരുക്കിയത് ജോസഫ്, കാവൽ, നൈറ്റ് ഡ്രൈവ് എന്നീ ചിത്രങ്ങളിലൂടെ ശ്രദ്ധ നേടിയ രെഞ്ജിൻ രാജുമാണ്. ഷമീർ മുഹമ്മദ് ആണ് പത്താം വളവിന്റെ എഡിറ്റർ.