പാട്ട് പാടാമോ എന്ന് ആരാധിക; കിടിലൻ മറുപടി നൽകി നിവിൻ പോളി; ഒപ്പമൊരു സമ്മാനവും; വീഡിയോ കാണാം

തന്റെ ഏറ്റവും പുതിയ ചിത്രമായ സാറ്റർഡേ നൈറ്റിന്റെ പ്രമോഷന്റെ തിരക്കിലാണ് ഇപ്പോൾ യുവ താരം നിവിൻ പോളി. നിവിൻ പോളിയും അജു വർഗീസും സിജു വിത്സനും സൈജു കുറുപ്പും സാനിയ ഇയ്യപ്പനും ഗ്രേസ് ആന്റണിയുമൊക്കെ അടങ്ങുന്ന താരനിര കേരളത്തിലെ പല പല കോളേജുകളിലും മാളുകളിലും പോയി ആരാധകരെ നേരിട്ട് കാണുകയും അവരുമായി സംവദിക്കുകയും ചെയ്യുകയാണ്. അതിന്റെ ഭാഗമായി ഇവർ തൃശൂർ എഞ്ചിനീയറിംഗ് കോളേജിൽ പോയപ്പോഴത്തെ ഒരു വീഡിയോ ആണ് ഇപ്പോൾ സോഷ്യൽ മീഡിയയിൽ വൈറലായി മാറുന്നത്. അവിടുത്തെ വിദ്യാർത്ഥികളുമായി സംവദിക്കവേ അപ്രതീക്ഷിതമായി ഒരു ഒരു വിദ്യാർത്ഥിനി നിവിനോട് പാട്ട് പാടാമോ എന്ന് ചോദിക്കുകയായിരുന്നു. മുൻപൊന്നും പാട്ടു പാടിയിട്ടില്ലാത്ത നിവിൻ പോളി ആ ചോദ്യത്തിന് നൽകിയ കിടിലൻ മറുപടിയാണ് ഇപ്പോൾ ശ്രദ്ധ നേടുന്നത്.

അതിനൊപ്പം ആരാധികക്ക് നിവിൻ ഒരു സമ്മാനവും നൽകി. പാട്ടുകള്‍ പാടിയാല്‍ കാണികള്‍ കൂവും എന്ന് പറഞ്ഞാണ് മുന്‍പൊക്കെ നിവിന്‍ പാടാതിരുന്നതെന്നും, ചാന്‍സ് കിട്ടിയാല്‍ നിവിന്‍ ചേട്ടനെകൊണ്ട് ഒരു പാട്ട് പാടിക്കണമെന്ന് ആഗ്രഹിച്ചിരുന്നു എന്നും പറഞ്ഞാണ് ആരാധിക നിവിനോട് പാടാമോ എന്ന് ചോദിച്ചത്. എല്ലാവരുടേയും കൂടെ സ്‌നേഹത്തോടെയും സന്തോഷത്തോടെയിരിക്കുമ്പോള്‍ പാട്ടുപാടി തന്റെ ഇമേജ് നശിപ്പിക്കാനുള്ള ശ്രമമല്ലേ എന്നായിരുന്നു വളരെ സരസമായി നിവിൻ പോളി ഈ ചോദ്യത്തിന് മറുപടി നൽകിയത്. ആർപ്പുവിളികളോടെയാണ് വിദ്യാർഥികൾ നിവിന്റെ ഈ മറുപടി സ്വീകരിച്ചത്. അതിനു ശേഷം ആ ചോദ്യം ചോദിച്ച വിദ്യാർത്ഥിനിയെ സ്റ്റേജില്‍ വിളിച്ച നിവിന്‍ പോളി, ആ കുട്ടിക്ക് ഒരു റോസാപ്പൂ സമ്മാനമായി നൽകുകയും അവർക്കൊപ്പം ഫോട്ടോ എടുക്കുകയും ചെയ്തു. റോഷൻ ആൻഡ്രൂസ് സംവിധാനം ചെയ്ത സാറ്റർഡേ നൈറ്റ് പൂജ റിലീസ് ആയി ഒക്ടോബറിൽ ആവും എത്തുക.