ചടുലമായ നൃത്തച്ചുവടുകളുമായി ഷെയിൻ നിഗം; വലിയ പെരുന്നാളിലെ ഗാനം തരംഗമാകുന്നു

യുവ താരം ഷെയിൻ നിഗം നായകനായി എത്തുന്ന പുതിയ ചിത്രമാണ് വലിയ പെരുന്നാൾ. ഈ വരുന്ന ക്രിസ്മസിന് തീയേറ്ററുകളിൽ എത്തുന്ന ഈ ചിത്രം സംവിധാനം ചെയ്തത് നവാഗതനായ ഡിമൽ ഡെന്നിസ് ആണ്. വലിയ പ്രേക്ഷക ശ്രദ്ധ നേടിയെടുത്ത ഇതിന്റെ പോസ്റ്ററുകൾക്കും ലിറിക് വീഡിയോകൾക്കും പിന്നാലെ ഇപ്പോഴിതാ ഈ ചിത്രത്തിലെ ഒരു സോങ് വീഡിയോയും തരംഗമാവുകയാണ്. താഴ്വാരങ്ങൾ എന്ന് തുടങ്ങുന്ന ഈ ഗാനം രചിച്ചത് അൻവർ അലിയും ഇതിനു സംഗീതം പകർന്നിരിക്കുന്നത് റെക്സ് വിജയനും ആണ്. റെക്സ് വിജയൻ തന്നെയാണ് ഈ ഗാനം ആലപിച്ചിരിക്കുന്നത്.

ഷെയിൻ നിഗമിന്റെയും നായികാ വേഷം ചെയ്യുന്ന ഹിമികയുടെയും ചടുലമായ നൃത്ത ചുവടുകളാണ് ഈ ഗാനത്തിന്റെ ഹൈലൈറ്റ്. ഒരു പ്രണയ ഗാനമായി ഒരുക്കിയിരിക്കുന്ന ഈ പാട്ടിലൂടെ നൃത്തത്തിൽ ഉള്ള തന്റെ കഴിവും ഷെയിൻ നിഗം കാണിച്ചു തന്നിരിക്കുകയാണ്. മാജിക് മൗണ്ടൻ സിനിമാസിന്റെ ബാനറിൽ മോനിഷ രാജീവ് നിർമിച്ചിരിക്കുന്ന ചിത്രം പ്രശസ്ത സംവിധായകൻ അൻവർ റഷീദ് ആണ് അവതരിപ്പിക്കുന്നത്.

സംവിധായകനായ ഡിമൽ ഡെന്നിസും തസ്രീക് അബ്ദുൽ സലാമും ചേർന്ന് തിരക്കഥ രചിച്ച ഈ ചിത്രത്തിൽ ജോജു ജോർജ്, അലെൻസിയർ, ധർമജൻ ബോൾഗാട്ടി, വിനായകൻ, നിഷാന്ത് സാഗർ, സുധീർ കരമന, അതുൽ കുൽക്കർണി, റാസ മുറാദ് എന്നിവരും അഭിനയിച്ചിരിക്കുന്നു. വിവേക് ഹർഷൻ എഡിറ്റിംഗ് നിർവഹിച്ചിരിക്കുന്ന ഈ ചിത്രത്തിൽ ആണ് അന്തരിച്ചു പോയ പ്രശസ്ത നടൻ ക്യാപ്റ്റൻ രാജു അവസാനമായി അഭിനയിച്ചത്. അന്താരാഷ്ട്രതലത്തിൽ ശ്രദ്ധേയമായ അംഗീകാരങ്ങൾ നേടിയെടുത്തിട്ടുള്ള നേടിയിട്ടുള്ള മുംബൈയിലെ കിങ്‌സ് യുണൈറ്റഡ് ആണ് ഇതിനു വേണ്ടി നൃത്ത രംഗങ്ങൾ ഒരുക്കിയത്.