വീണ്ടും അനിരുദ്ധ് മാജിക്; ഡോണിലെ പാട്ടും സൂപ്പർ ഹിറ്റ്; വീഡിയോ കാണാം..!

തമിഴ് ചിത്രമായ ഡോണിലെ ഏറ്റവും പുതിയ ഗാനമാണ് ഇപ്പോൾ സോഷ്യൽ മീഡിയയിൽ വൈറലായി മാറുന്നത്. ഇന്നലെ റിലീസ് ചെയ്ത ഈ ഗാനം ഇതിനോടകം 20 ലക്ഷത്തിലധികം കാഴ്ചക്കാരെയാണ് നേടിയത്. ശിവകാർത്തികേയൻ നായകനായി എത്തുന്ന ഡോൺ നിർമ്മിച്ചിരിക്കുന്നതും അദ്ദേഹമാണ്. ഈ ചിത്രത്തിന് വേണ്ടി അനിരുദ്ധ് രവിചന്ദർ ഈണമിട്ട ബേ, കണ്ണാലെ തിട്ടിടാതെ. എന്ന വരികളോടെ തുടങ്ങുന്ന പ്രണയ ഗാനമാണ് ഇപ്പോൾ സൂപ്പർ ഹിറ്റായി മാറിയിരിക്കുന്നത്. വീണ്ടും അനിരുദ്ധ് മാജിക് ആവർത്തിച്ചു എന്നാണ് ഈ ഗാനത്തെ കുറിച്ച് സോഷ്യൽ മീഡിയ അഭിപ്രായപ്പെടുന്നത്. ശിവകാർത്തികേയൻ, നായികാ വേഷം ചെയ്യുന്ന പ്രിയങ്ക മോഹൻ എന്നിവർ ചേർന്നുള്ള പ്രണയ രംഗങ്ങൾ നിറഞ്ഞ ഈ ഗാനം യുവ പ്രേക്ഷകരുടെ മനസ്സ് കീഴടക്കി കഴിഞ്ഞു എന്ന് തന്നെയാണ് അവരുടെ പ്രതികരണം സൂചിപ്പിക്കുന്നത്. വരുന്ന മാർച്ച് അവസാന വാരം ഡോൺ തീയേറ്ററുകളിൽ എത്തുമെന്നാണ് പ്രതീക്ഷിക്കുന്നത്.

പ്രശസ്ത സംവിധായകൻ വിഘ്‌നേശ് ശിവൻ ആണ് ഈ ഗാനത്തിന് വരികൾ രചിച്ചിരിക്കുന്നത്. ആദിത്യ ആർ കെ ആണ് ഈ ഗാനം ആലപിച്ചിരിക്കുന്നത്. ശിവകാർത്തികേയൻ, പ്രിയങ്ക മോഹൻ എന്നിവരെ കൂടാതെ എസ് ജെ സൂര്യ, സമുദ്രക്കനി, സൂരി എന്നിവരും അഭിനയിക്കുന്ന ഈ ചിത്രം രചിച്ചു സംവിധാനം ചെയ്തിരിക്കുന്നത് സിബി ചക്രവർത്തി ആണ്. കെ എം ഭാസ്കരൻ കാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് നാഗൂരൻ ആണ്. സോണി മ്യൂസിക് സൗത്ത് യൂട്യൂബ് ചാനലിൽ റിലീസ് ചെയ്തിരിക്കുന്ന ഈ പുതിയ ഗാനം കൂടി ഹിറ്റായി മാറിയതോടെ ഡോൺ എന്ന ചിത്രത്തിന് മേലുള്ള പ്രേക്ഷക പ്രതീക്ഷകൾ വളരെയധികം വർധിച്ചു എന്ന് തന്നെ പറയാം.