പ്രേക്ഷക മനസ്സിൽ തൊട്ട് “നീയെന്നൊരാളില്‍”; സൂപ്പർ ഹിറ്റായി പാപ്പനിലെ ആദ്യ ഗാനം; വീഡിയോ കാണാം

ആക്ഷൻ സൂപ്പർ സ്റ്റാർ സുരേഷ് ഗോപിയെ നായകനാക്കി മാസ്റ്റർ ഡയറക്ടർ ജോഷി സംവിധാനം ചെയ്ത പാപ്പൻ ഈ വരുന്ന ജൂലൈ 29 ന് ആഗോള റിലീസായി എത്തുകയാണ്. ആർ ജെ ഷാൻ തിരക്കഥ രചിച്ച ഈ മാസ്സ് ക്രൈം ത്രില്ലർ ചിത്രം വലിയ പ്രതീക്ഷകളോടെയാണ് പ്രേക്ഷകർ കാത്തിരിക്കുന്നത്. ഇതിന്റെ ട്രൈലെർ വലിയ രീതിയിലാണ് പ്രേക്ഷക ശ്രദ്ധ നേടിയെടുത്തത്. ഇപ്പോഴിതാ ഈ ചിത്രത്തിലെ ആദ്യ ഗാനവും കയ്യടി നേടുകയാണ്. കഴിഞ്ഞ ദിവസമാണ് ഇതിലെ ആദ്യ ഗാനത്തിന്റെ ലിറിക്കൽ വീഡിയോ റിലീസ് ചെയ്തത്. നീയെന്നോരാളില്‍ എന്ന് തുടങ്ങുന്ന ഈ ഗാനം ആലപിച്ചിരിക്കുന്നത് വിജയ് യേശുദാസും രചിച്ചിരിക്കുന്നത് ജ്യോതിഷ് കാശിയുമാണ്. ജേക്‌സ് ബിജോയിയാണ് ഈ ചിത്രത്തിന്റെ സംഗീത സംവിധാനം നിർവഹിച്ചിരിക്കുന്നത്. വളരെ പതിഞ്ഞ താളത്തിൽ ചിട്ടപ്പെടുത്തിയിരിക്കുന്ന ഈ ഗാനം പെട്ടെന്ന് തന്നെ പ്രേക്ഷകരുടെ മനസ്സിൽ തൊടുന്നുണ്ട്.

സുരേഷ് ഗോപിയെ കൂടാതെ നൈല ഉഷ, നീത പിള്ളൈ, ഗോകുൽ സുരേഷ് ഗോപി, ആശ ശരത്, കനിഹ, മാളവിക മേനോൻ, വിജയ രാഘവൻ, ടിനി ടോം, ഷമ്മി തിലകൻ, ശ്രീജിത്ത് രവി, മാല പാർവതി, സാധിക വേണുഗോപാൽ, അഭിഷേക് രവീന്ദ്രൻ, ചന്ദുനാഥ്, ഡയാന ഹമീദ്, ജുവൽ മേരി തുടങ്ങി ഒരു വമ്പൻ താരനിര അണിനിരക്കുന്ന ഈ ചിത്രം, ഡേവിഡ് കാച്ചപ്പിള്ളി പ്രൊഡക്ഷൻസിന്റെയും ഇഫാർ മീഡിയയുടെയും, ശ്രീ ഗോകുലം മൂവീസിന്റെയും ബാനറിൽ യഥാക്രമം ഡേവിഡ് കാച്ചപ്പിള്ളിയും റാഫി മതിരയും ഗോകുലം ഗോപാലനും ചേർന്നാണ് നിർമ്മിച്ചിരിക്കുന്നത്. എബ്രഹാം മാത്യു മാത്തൻ എന്ന തീപ്പൊരി പോലീസ് ഓഫീസറായാണ് സുരേഷ് ഗോപി ഇതിൽ അഭിനയിച്ചിരിക്കുന്നത്.