വിസ്മയിപ്പിക്കുന്ന ദൃശ്യങ്ങളുമായി മഹാവീര്യർ പ്രൊമോ സോങ്; വീഡിയോ കാണാം

മലയാളത്തിന്റെ യുവതാരങ്ങളായ നിവിൻ പോളി, ആസിഫ് അലി എന്നിവരെ കേന്ദ്ര കഥാപാത്രങ്ങളാക്കി സൂപ്പർ ഹിറ്റ് സംവിധായകൻ എബ്രിഡ് ഷൈൻ ഒരുക്കിയ മഹാവീര്യർ ജൂലൈ 21 നു ആഗോള റിലീസായി എത്തുകയാണ്. ഫാന്റസിയും കോമെടിയും ടൈം ട്രാവലും കോടതിയും നിയമ വ്യവഹാരങ്ങളും നിറഞ്ഞ ഈ ചിത്രത്തിന്റെ ടീസർ, ട്രൈലെർ, ഗാനങ്ങളെന്നിവ വമ്പൻ ശ്രദ്ധയാണ് നേടിയെടുത്തത്. മലയാള സിനിമാ പ്രേമികൾ ഇതുവരെ കാണാത്ത ഒരു സിനിമാനുഭവം മഹാവീര്യർ സമ്മാനിക്കുമെന്ന പ്രതീതിയാണ് അവയോരോന്നും സമ്മാനിച്ചത്. ഇപ്പോഴിതാ ഇതിന്റെ ഒരു പ്രൊമോ സോങ് കൂടി അവർ റിലീസ് ചെയ്തിരിക്കുകയാണ്. തകരമലേ സമയമലേ ഉണരൂ എന്ന വരികളോടെ തുടങ്ങുന്ന ഈ ഗാനം രചിച്ചത് ബി കെ ഹരിനാരായണനും ആലപിച്ചത് ആനന്ദ് ശ്രീരാജ്, കെ എസ് ഹരിശങ്കർ എന്നിവർ ചേർന്നുമാണ്. ഇഷാൻ ചാബ്രയാണ് ഇതിനു വേണ്ടി സംഗീത സംവിധാനം നിർവഹിച്ചിരിക്കുന്നത്.

പോളി ജൂനിയർ പിക്‌ചേഴ്‌സിന്റെ ബാനറിൽ നിവിൻ പോളിയും ഇന്ത്യൻ മൂവി മേക്കേഴ്സിന്റെ ബാനറിൽ ഷംനാസും ചേർന്ന് നിർമ്മിച്ച ഈ ചിത്രത്തിൽ കന്നഡ നടി ഷാൻവി ശ്രീവാസ്തവ, മലയാള താരങ്ങളായ ലാൽ, സിദ്ദിഖ്, ലാലു അലക്സ്, വിജയ് മേനോൻ, കൃഷ്ണ പ്രസാദ്, മേജർ രവി, സുധീർ കരമന, മല്ലിക സുകുമാരൻ, പദ്മരാജൻ എന്നിവർ മറ്റു നിർണ്ണായക വേഷങ്ങൾ ചെയ്തിരിക്കുന്നു. പ്രശസ്ത മലയാള സാഹിത്യകാരൻ എം മുകുന്ദൻ രചിച്ച കഥയെ അടിസ്ഥാനമാക്കിയാണ് മഹാവീര്യർ ഒരുക്കിയിരിക്കുന്നത്. എബ്രിഡ് ഷൈൻ തന്നെ തിരക്കഥ രചിച്ച മഹാവീര്യർക്കു വേണ്ടി ദൃശ്യളൊരുക്കിയത് ചന്ദ്രു സെൽവരാജ്, ഈ ചിത്രം എഡിറ്റ് ചെയ്തിരിക്കുന്നത് മനോജ് എന്നിവരാണ്.