കുത്തിയൊലിക്കുന്ന പുഴയിൽ ചങ്ങാടം ഒറ്റയ്ക്ക് തുഴഞ്ഞ് മോഹൻലാൽ; വൈറൽ വീഡിയോ കാണാം

ഇന്നലെ സമൂഹ മാധ്യമങ്ങളിൽ നിറഞ്ഞു നിന്നത് മലയാളത്തിന്റെ മഹാനടൻ മോഹൻലാൽ ആയിരുന്നു. കുത്തിയൊലിക്കുന്ന പുഴയിൽ ഒരു വലിയ ചങ്ങാടം ഒറ്റയ്ക്ക് തുഴഞ്ഞു നീങ്ങുന്ന മോഹൻലാലിന്റെ വീഡിയോ ആണ് സോഷ്യൽ മീഡിയയിൽ വൈറലായത്. കനത്ത മഴയത്തു, തൊമ്മൻകുത്ത് പുഴ കുത്തിയൊഴുകുന്ന സമയത്താണ് ഒരു ഡ്യൂപ് പോലുമില്ലാതെ മോഹൻലാൽ ഒറ്റയ്ക്ക് പുഴയിലിറങ്ങി ചങ്ങാടം തുഴഞ്ഞു നീങ്ങിയത്. പ്രിയദർശൻ സംവിധാനം ചെയ്യുന്ന ഓളവും തീരവും എന്ന ചിത്രത്തിന് വേണ്ടിയാണ് മോഹൻലാൽ ഈ രംഗം അഭിനയിച്ചത്. എം ടി വാസുദേവൻ തിരക്കഥ രചിച്ച ഈ ചിത്രത്തിന്റെ ഷൂട്ടിംഗ് ജൂലൈ ആറിനാണ് ആരംഭിച്ചത്. തൊടുപുഴ, തൊമ്മൻകുത്ത്, കാഞ്ഞാർ എന്നിവിടങ്ങളിലാണ് ഈ ചിത്രം ഷൂട്ട് ചെയ്യുന്നത്. മോഹൻലാലിനൊപ്പം ഹരീഷ് പേരാടി, മാമുക്കോയ, എന്നിവരും ഈ ചിത്രത്തിൽ അഭിനയിക്കുന്നുണ്ട്.

സന്തോഷ് ശിവൻ ക്യാമറ ചലിപ്പിക്കുന്ന ഈ ചിത്രത്തിന് കലാസംവിധാനം നിർവഹിക്കുന്നത് സാബു സിറിലാണ്. അമ്പതു വർഷം മുൻപ് പ്രശസ്‍ത സംവിധായകൻ പി എൻ മേനോൻ സിനിമയാക്കിയ കഥയാണ് ഓളവും തീരവും. ആ സിനിമയ്ക്കും അതിന്റെ അണിയറപ്രവര്‍ത്തകര്‍ക്കുമുള്ള ആദരമെന്ന നിലയിൽ ഇപ്പോൾ ആ ചിത്രം പുനരവതരിപ്പിക്കുകയാണ് പ്രിയദർശൻ. എം ടി വാസുദേവൻ നായരുടെ പത്തു ചെറുകഥകൾ ചേർത്ത് നെറ്റ്ഫ്ലിക്സ് ഒരുക്കുന്ന ആന്തോളജിയുടെ ഭാഗമായാണ് ഈ ചിത്രം അദ്ദേഹം ഒരുക്കുന്നത്. മധു, ഉഷ നന്ദിനി, ജോസ് പ്രകാശ്, നിലമ്പൂർ ബാലൻ എന്നിവരാണ് 1970 ഇൽ പുറത്തു വന്ന ഓളവും തീരവും എന്ന ചിത്രത്തിൽ വേഷമിട്ടത്. ശ്യാമ പ്രസാദ്, ജയരാജ്, സന്തോഷ് ശിവൻ, മഹേഷ് നാരായണൻ, ലിജോ ജോസ് പെല്ലിശ്ശേരി, അശ്വതി നായർ എന്നിവരും ഈ ആന്തോളജി സീരിസിന് വേണ്ടി ചിത്രങ്ങൾ ഒരുക്കുന്നുണ്ട്.