ഹരിശങ്കറിനെ ശബ്ദത്തിൽ മറ്റൊരു മനോഹരമായ ഗാനം കൂടി; അൽ മല്ലുവിലെ പുതിയ ഗാനം എത്തി

ജനപ്രിയൻ, ഹാപ്പി ജേർണി, റോമൻസ്, ഷാജഹാനും പരീക്കുട്ടിയും, വികട കുമാരൻ എന്നീ ചിത്രങ്ങൾ നമ്മുക്ക് സമ്മാനിച്ച ബോബൻ സാമുവൽ രചിച്ചു സംവിധാനം ചെയ്ത പുതിയ ചിത്രമാണ് അൽ മല്ലു. നമിതാ പ്രമോദ് നായികാ വേഷം ചെയ്യുന്ന ഈ ചിത്രം ഉടൻ തന്നെ റിലീസിന് എത്തും. ഈ ചിത്രത്തിന്റെ ട്രൈലെർ വലിയ പ്രേക്ഷക ശ്രദ്ധയാണ് പിടിച്ചു പറ്റിയത്. പ്രവാസിയായ ഒരു മലയാളി പെൺകുട്ടിയുടെ ജീവിതത്തിൽ സംഭവിക്കുന്ന ചില അപ്രതീക്ഷിത കാര്യങ്ങൾ വളരെ ആവേശകരമായും രസകരമായും അവതരിപ്പിക്കുന്ന ചിത്രമാണ് ഇതെന്നാണ് ലഭിക്കുന്ന റിപ്പോർട്ടുകൾ പറയുന്നത്. ഇപ്പോഴിതാ ഈ ചിത്രത്തിലെ മനോഹരമായ ഒരു ഗാനത്തിന്റെ വീഡിയോ റിലീസ് ചെയ്തിരിക്കുകയാണ്.

മേടമാസ എന്ന് തുടങ്ങുന്ന ഈ മനോഹരമായ ഗാനത്തിന് ഈണം നൽകിയിരിക്കുന്നത് ജോസഫിലെ ഗാനങ്ങൾക്ക് ഈണം നൽകി പ്രേക്ഷകരുടെ പ്രിയങ്കരൻ ആയി മാറിയ രഞ്ജിൻ രാജ് ആണ്. ബി കെ ഹരിനാരായണൻ വരികൾ എഴുതിയ ഈ ഗാനം ആലപിച്ചിരിക്കുന്നത് പുതു തലമുറയിലെ സൂപ്പർ ഹിറ്റ് ഗായകരായ ഹരിശങ്കറും ശ്വേതാ മോഹനും ചേർന്നാണ്. മെഹ്ഫിൽ പ്രൊഡക്ഷൻസിന്റെ ബാനറിൽ സജിൽസ് മജീദ് നിർമ്മിച്ചിരിക്കുന്ന ഈ ചിത്രത്തിൽ ഒരു വലിയ താര നിര തന്നെ അണിനിരന്നിട്ടുണ്ട്. വിവേക് മേനോൻ ദൃശ്യങ്ങൾ ഒരുക്കിയ അൽ മല്ലു എഡിറ്റ് ചെയ്തിരിക്കുന്നത് ദീപു ജോസഫ് ആണ്. മിയ,സിദ്ധിഖ്, ലാൽ, പ്രേം പ്രകാശ്, ഫാരിസ്, മിഥുന്‍ രമേശ്, ധര്‍മ്മജന്‍ ബോള്‍ഗാട്ടി, സോഹൻ സീനുലാൽ, ഷീലു ഏബ്രഹാം, രശ്മി ബോബൻ, സിനില്‍ സൈനുദ്ദീന്‍, വരദ ജിഷിന്‍, ജെന്നിഫര്‍, അനൂപ് എന്നിവർ ആണ് ഈ ചിത്രത്തിലെ മറ്റു താരങ്ങൾ.