ദുൽഖർ സൽമാൻ- അനൂപ് സത്യൻ ചിത്രത്തിൽ നിന്നൊരു സർപ്രൈസ് എത്തുന്നു; ആവേശത്തോടെ ആരാധകർ

സത്യൻ അന്തിക്കാടിന്റെ മകൻ അനൂപ് സത്യൻ ആദ്യമായി സംവിധാനം ചെയ്ത ചിത്രമാണ് വരനെ ആവശ്യമുണ്ട്. ദുൽഖർ സൽമാൻ ആദ്യമായി നിർമ്മിക്കുന്ന ഈ ചിത്രത്തിൽ സുരേഷ് ഗോപി, ശോഭന, ദുൽഖർ സൽമാൻ, കല്യാണി പ്രിയദർശൻ, ഉർവശി, കെ പി എ സി ലളിത, അതിഥി വേഷത്തിൽ സൗബിൻ ഷാഹിർ എന്നിവർ ആണ് അഭിനയിക്കുന്നത്. അടുത്ത മാസം റിലീസ് ചെയ്യാൻ ഒരുങ്ങുന്ന ഈ ചിത്രത്തിന്റെ ടീസർ റിലീസ് ചെയ്യുന്നില്ല എന്നാണ് ഇതിന്റെ അണിയറ പ്രവർത്തകരുടെ തീരുമാനം എന്ന് റിപ്പോർട്ടുകൾ സൂചിപ്പിക്കുന്നു. ടീസർ റിലീസ് ചെയ്യാതെ, അതിനു പകരമായി ഇതിലെ ഒരു വീഡിയോ സോങ് റിലീസ് ചെയ്യാൻ ആണ് അവർ തീരുമാനിച്ചിരിക്കുന്നത്. ഈ ചിത്രത്തിലെ ആദ്യ വീഡിയോ സോങ് നാളെ പ്രേക്ഷകരുടെ മുന്നിൽ എത്തും.

സാധാരണ ടീസർ, ട്രൈലെർ, പിന്നെ വീഡിയോ സോങ് എന്ന മാതൃക ആണ് എല്ലാ സിനിമകളും സ്വീകരിക്കാറുള്ളത്. അത് ആരാധകർ വലിയ ആഘോഷമാക്കാറുമുണ്ട്. എന്നാൽ ഇത്തവണ വ്യത്യസ്തമായ പ്രമോഷൻ രീതികൾ ആണ് ഈ സിനിമയുടെ ടീം അവലംബിച്ചിരിക്കുന്നത്. ദുൽഖർ സൽമാൻ ആരംഭിച്ച വെഫെയറർ ഫിലിംസിന്റെ ആദ്യ സിനിമയാണിത്. കല്യാണി പ്രിയദർശന്റെ ആദ്യ മലയാളം റിലീസ് കൂടി ആണ് ഇതെന്ന പ്രത്യേകതയും ഈ ചിത്രത്തിന് ഉണ്ട്. ഇനി മോഹൻലാൽ- പ്രിയദർശൻ ചിത്രം മരക്കാർ അറബിക്കടലിന്റെ സിംഹം, വിനീത് ശ്രീനിവാസൻ- പ്രണവ് മോഹൻലാൽ ചിത്രം ഹൃദയം എന്നിവയും കല്യാണി അഭിനയിച്ചു ഈ വർഷം റിലീസ് ചെയ്യും. അൽഫോൻസ് ജോസഫ് ആണ് വരനെ ആവശ്യമുണ്ട് എന്ന ഈ ചിത്രത്തിന് വേണ്ടി സംഗീതം ഒരുക്കിയിരിക്കുന്നത്. ഇതിന്റെ പോസ്റ്ററുകൾ സോഷ്യൽ മീഡിയയുടെ ശ്രദ്ധ നേടിയെടുത്തിരുന്നു.