മഹാദേവ് ആയി മാസ്സ് ലുക്കിൽ മെഗാ സ്റ്റാർ; മമ്മൂട്ടി- അഖിൽ അക്കിനേനി ചിത്രം ഏജൻറ് ടീസർ കാണാം

യാത്ര എന്ന ചിത്രത്തിന് ശേഷം, മലയാളത്തിന്റെ മെഗാസ്റ്റാർ മമ്മൂട്ടി തെലുങ്കിൽ അഭിനയിച്ച പുതിയ ചിത്രമായ ഏജന്റിന്റെ ആദ്യ ടീസർ ഇന്ന് പുറത്തു വന്നു. ത്രില്ലടിപ്പിക്കുന്ന ആക്ഷൻ രംഗങ്ങളാൽ സമ്പന്നമായ ഈ ടീസർ ചിത്രത്തെ കുറിച്ചുള്ള പ്രേക്ഷക പ്രതീക്ഷകളും വാനോളമാണ് ഉയർത്തിയത്. തെലുങ്ക്, ഹിന്ദി, തമിഴ്, കന്നഡ, മലയാളം ഭാഷകളിൽ ഒരേസമയം റിലീസ് ചെയ്യാൻ പ്ലാൻ ചെയ്യുന്ന ഈ ചിത്രം, സൂപ്പർ ഹിറ്റ് തെലുങ്കു സംവിധായകൻ സുരീന്ദർ റെഡ്‌ഡിയാണ് സംവിധാനം ചെയ്തിരിക്കുന്നത്. ഹോളിവുഡിലെ സൂപ്പർ ഹിറ്റ് ത്രില്ലർ സീരിസായ ബോൺ സീരിസിൽ നിന്ന് പ്രചോദനമുൾക്കൊണ്ടാണ് ഈ ചിത്രം ഒരുക്കിയിരിക്കുന്നതെന്നത് വാർത്തകൾ പറയുന്നു. അഖിൽ അക്കിനേനി നായകനായി എത്തുന്ന ഈ ചിത്രത്തിൽ മഹാദേവ് എന്ന് പേരുള്ള ഒരു പട്ടാള ഓഫീസർ ആയാണ് മമ്മൂട്ടി അഭിനയിച്ചിരിക്കുന്നത്. അഖിൽ അക്കിനേനി ഈ ചിത്രത്തിന് വേണ്ടി നടത്തിയ ശാരീരിക മാറ്റം വലിയ ശ്രദ്ധയാണ് സോഷ്യൽ മീഡിയയിൽ നിന്നും നേടിയത്.

ഈ ചിത്രത്തിന്റേതായി ഇതുവരെ പുറത്തു വന്നിട്ടുള്ള പോസ്റ്ററുകളും സൂപ്പർ ഹിറ്റുകളാണ്. അഖിലിന്റെ സ്റ്റൈലിഷ് ആക്ഷൻ രംഗങ്ങൾ ഈ ചിത്രത്തിന്റെ ഹൈലൈറ്റായി മാറുമെന്നാണ് റിപ്പോർട്ടുകൾ സൂചിപ്പിക്കുന്നത്. ഹിപ് ഹോപ് തമിഴ സംഗീത സംവിധാനം നിർവഹിക്കുന്ന ഈ ചിത്രം രചിച്ചിരിക്കുന്നത് വക്കന്തം വംശി, ഈ ചിത്രം എഡിറ്റ് ചെയ്തിരിക്കുന്നത് ദേശീയ അവാർഡ് ജേതാവായ നവീൻ നൂലി, ഇതിനു ക്യാമറ ചലിപ്പിച്ചത് റസൂൽ എല്ലൂർ എന്നിവരാണ്. നവാഗതയായ സാക്ഷി വൈദ്യ നായികാ വേഷം ചെയ്യുന്ന ഈ ചിത്രം എകെ എന്റർടൈൻമെന്റ്‌സിന്റെയും സുരേന്ദർ 2 സിനിമയുടെയും ബാനറിൽ രാമബ്രഹ്മം സുങ്കരയാണ് നിർമ്മിച്ചത്. ഹംഗറി, ഹൈദരാബാദ്, ഡൽഹി തുടങ്ങിയ ലൊക്കേഷനുകളിലാണ് ഈ ചിത്രം കൂടുതലും ഷൂട്ട് ചെയ്തത്.