ഭൂമിക്കടിയിലെ ആ ഭീകരനിമിഷങ്ങൾ ചിത്രീകരിച്ചതിങ്ങനെ; മലയൻകുഞ്ഞ് മേക്കിങ് വീഡിയോ കാണാം

ഫഹദ് ഫാസിൽ നായകനായി എത്തുന്ന മലയൻ കുഞ്ഞെന്ന ചിത്രമാണ് ഇപ്പോൾ മലയാള സിനിമാ പ്രേമികൾ ഏറെ ആകാംഷയോടെ കാത്തിരിക്കുന്നത്. പ്രകൃതി ദുരന്തത്തിന്റെ പശ്‌ചാത്തലത്തിൽ ഒരു സർവൈവൽ ത്രില്ലറായി ഒരുക്കിയ ഈ ചിത്രം രചിച്ചത് മഹേഷ് നാരായണനും സംവിധാനം ചെയ്തത് നവാഗതനായ സജിമോനുമാണ്. ഇതിന്റെ ട്രൈലെർ പുറത്തു വന്നതോടെ ചിത്രത്തെ കുറിച്ചുള്ള പ്രതീക്ഷകൾ വാനോളമായിക്കഴിഞ്ഞു. ഉരുൾപൊട്ടലിൽ പെട്ട്, ഭൂമിക്കടിയിൽ മുപ്പതടി താഴ്ചയിൽ കുടുങ്ങി പോകുന്ന ഒരു ചെറുപ്പക്കാരന്റെ തിരിച്ചു വരവിന്റെ കഥ പറയുന്ന ഈ ചിത്രത്തിന്റെ മേക്കിങ് വീഡിയോ ഇപ്പോൾ പുറത്തു വന്നിരിക്കുകയാണ്. മണ്ണിനടിയില്‍ ഷൂട്ട് ചെയ്ത ചിത്രത്തിന്റെ ബിഹൈന്‍ഡ് ദി സീന്‍ വീഡിയോ നമ്മുക്ക് കാണിച്ചു തരുന്നത്, എത്രമാത്രം ബുദ്ധിമുട്ടിയാണ് ഈ ചിത്രം ഒരുക്കിയിരിക്കുന്നതെന്നാണ്. ശ്വാസമടക്കി പിടിച്ചു മാത്രമേ നമ്മുക്ക് ഈ മേക്കിങ് വീഡിയോ പോലും കണ്ടു തീർക്കാൻ കഴിയു എന്നതാണ് സത്യം.

2 മിനിറ്റ് 47 സെക്കന്റ് ദൈര്‍ഘ്യമുള്ള ഈ മേക്കിങ് വീഡിയോ മ്യൂസിക്ക് 247 ചാനലിലൂടെയാണ് റിലീസ് ചെയ്തിരിക്കുന്നത്. ഉരുൾപൊട്ടലും ഭൂമിക്കടിയിലുള്ള രംഗങ്ങളും ഒരുക്കുകയെന്നതു എത്രമാത്രം വെല്ലുവിളി നിറഞ്ഞതായിരുന്നു എന്നും, ഫഹദ് ഫാസിൽ എത്രത്തോളം പരിശ്രമമാണ് ഇതിനു വേണ്ടി എടുത്തതെന്നും ഈ വീഡിയോ കാണിച്ചു തരുന്നു. അതുപോലെ ചിത്രത്തിന്റെ ആർട്ട് വിഭാഗം എടുത്ത പരിശ്രമവും ഇതിൽ നമ്മുക്ക് കാണാം. സംവിധായകൻ ഫാസിൽ നിർമ്മിച്ച ഈ ചിത്രം ജൂലൈ 22 നാണു റിലീസ് ചെയ്യാൻ പോകുന്നത്. മഹേഷ് നാരായണൻ തന്നെയാണ് ഈ ചിത്രത്തിന് കാമറ ചലിപ്പിച്ചതും. എ ആർ റഹ്മാൻ സംഗീതമൊരുക്കിയ ഈ ചിത്രം എഡിറ്റ് ചെയ്തത് അർജു ബെൻ ആണ്.