മാസ്സും ക്ലാസ്സുമായി ചിയാൻ വിക്രം; മഹാൻ ഒഫീഷ്യൽ ടീസർ എത്തി; വീഡിയോ കാണാം..!

തമിഴ് സൂപ്പർ താരം ചിയാൻ വിക്രം നായകനായി എത്തുന്ന പുതിയ ചിത്രമാണ് മഹാൻ. കാർത്തിക് സുബ്ബരാജ് സംവിധാനം ചെയ്ത ഈ ചിത്രം നേരിട്ടുള്ള ഒറ്റിറ്റി റിലീസ് ആയി ആമസോൺ പ്രൈമിൽ ആണ് റിലീസ് ചെയ്യുന്നത്. ഈ വരുന്ന ഫെബ്രുവരി പത്തിന് റിലീസ് ചെയ്യാൻ പോകുന്ന ഈ ചിത്രത്തിന്റെ ആദ്യ ടീസർ ഇപ്പോൾ എത്തിക്കഴിഞ്ഞു. മാസ്സും ക്ലാസ്സുമായി ചിയാൻ വിക്രം നിറഞ്ഞാടുന്ന ഒരു ടീസർ ആണ് ഇപ്പോൾ പ്രേക്ഷകരുടെ മുന്നിൽ എത്തിയിരിക്കുന്നത്. ഗാന്ധി മഹാൻ എന്ന കഥാപാത്രമായി ആണ് വിക്രം ഈ ചിത്രത്തിൽ എത്തുന്നത്. വിക്രത്തിനൊപ്പം അദ്ദേഹത്തിന്റെ മകൻ ധ്രുവ് വിക്രമും ഈ ചിത്രത്തിൽ അഭിനയിക്കുന്നുണ്ട്. അച്ഛനും മകനും ആയി തന്നെയാണ് വിക്രം- ധ്രുവ് വിക്രം ടീം ഈ ചിത്രത്തിൽ അഭിനയിച്ചിരിക്കുന്നത്. മകൻ ധ്രുവിനൊപ്പം ആദ്യമായി ഒന്നിച്ചഭിനയിച്ച ഈ ചിത്രം, ചിയാൻ വിക്രത്തിന്റെ കരിയറിലെ അറുപതാമത്തെ ചിത്രമാണെന്ന പ്രത്യേകതയും ഉണ്ട്.

സൂപ്പർ ഹിറ്റ് സംഗീത സംവിധായകൻ സന്തോഷ് നാരായണൻ സംഗീത സംവിധാനം നിർവഹിച്ചിരിക്കുന്ന ഈ ചിത്രത്തിലെ, വിക്രമിന്റെയും ധ്രുവ് വിക്രമിന്റെയും ലുക്ക് സോഷ്യൽ മീഡിയയിൽ സൂപ്പർ ഹിറ്റായിരുന്നു. സിമ്രൻ, മുത്തു കുമാർ, വാണി ഭോജൻ, സനന്ത് എന്നിവരും അഭിനയിക്കുന്ന ഈ ചിത്രം നിർമ്മിച്ചത് എസ് എസ് ലളിത് കുമാർ ആണ്. ശ്രേയസ് കൃഷ്ണ കാമറ ചലിപ്പിച്ച ഈ ചിത്രം എഡിറ്റ് ചെയ്തിരിക്കുന്നത് വിവേക് ഹർഷൻ ആണ്. കോബ്ര, ധ്രുവ നചത്രം, പൊന്നിയിൻ സെൽവൻ എന്നിവയാണ് മഹാന് ശേഷം റിലീസ് ചെയ്യാനുള്ള ചിയാൻ വിക്രം ചിത്രങ്ങൾ. കാർത്തിക് സുബ്ബരാജിന്റെ തൊട്ടു മുൻപത്തെ ചിത്രമായ ജഗമേ തന്തിരവും ഒറ്റിറ്റി റിലീസ് ആയാണ് പുറത്തു വന്നത്.