കമ്മാരസംഭവത്തിന്റെ തകർപ്പൻ ട്രൈലർ സോഷ്യൽ മീഡിയയിൽ തരംഗമാകുന്നു…

ദിലീപ് നായകനായി എത്തിയ കമ്മാരസംഭവത്തിന്റെ രണ്ടാമത്തെ ട്രൈലർ പുറത്തിറങ്ങി. കഥയിലും ആഖ്യാനത്തിലും വ്യത്യസ്തമായ അനുഭവം തീർത്ത ചിത്രം റിലീസിന് ശേഷം ട്രൈലർ പുറത്തിറക്കി വ്യത്യസ്തത തുടരുകയാണ്. ആദ്യ ട്രൈലർ മാസ്സ് രംഗങ്ങൾക്ക് പ്രാധാന്യം നൽകിയായിരുന്നു ഒരുക്കിയത്. അന്ന് ആ ട്രൈലർ വളരെയധികം ശ്രദ്ധ നേടിയിരുന്നു. ഇന്ന് പുറത്തിറങ്ങിയ ട്രൈലറും വലിയ തരംഗം സൃഷ്ടിച്ചു മുന്നേറുമെന്നു പ്രതീക്ഷിക്കാം. വിഷു റിലീസായി തീയറ്ററുകളിൽ എത്തിയ ചിത്രം ആദ്യ ദിവസം മികച്ച പ്രതികരണമാണ് വന്നത് എങ്കിലും പിന്നീട് സമ്മിശ്ര പ്രതികരണങ്ങൾ കൂടി വന്നു. പരീക്ഷണ ചിത്രമായി ഒരുക്കിയ കമ്മാരസംഭവം പ്രേക്ഷകരിലേക്ക് വീണ്ടും എത്തി തരംഗം തുടരാൻ കൂടിയാണ് പുതിയ ട്രൈലറുമായി എത്തിയിരിക്കുന്നത്.

നവാഗതനായ രതീഷ് അമ്പാട്ടാണ് ചിത്രം സംവിധാനം ചെയ്തിരിക്കുന്നത്. ചിത്രത്തിൽ തെന്നിന്ത്യയിലെ സൂപ്പർ താരങ്ങളും അണിനിരന്നിട്ടുണ്ട്. വക്രബുദ്ധിക്കാരനായ കമ്മാരൻ നമ്പ്യാർ ആയി ദിലീപ് ചിത്രത്തിൽ എത്തുമ്പോൾ ഒതേനൻ നമ്പ്യാർ എന്ന കഥാപാത്രമായി സിദ്ധാർഥും ചിത്രത്തിൽ അഭിനയിച്ചിരിക്കുന്നു. ചരിത്ര കഥപറയുന്ന ചിത്രത്തിൽ ചരിത്രത്തെ വളച്ചൊടിച്ചവരെ കണക്കറ്റ് പരിഹസിക്കുന്നുണ്ട്. ബോബി സിംഹ, നമിത പ്രമോദ്, വിജയരാഘവൻ, ഇന്ദ്രൻസ്, തുടങ്ങിയവർ ചിത്രത്തിൽ അഭിനയിച്ചിരിക്കുന്നു. മുരളി ഗോപിയാണ് രചന നിർവ്വഹിച്ചിരിക്കുന്നത്. സുനിൽ കെ. എസ് ചിത്രത്തിനായി ഛായാഗ്രഹണം ഒരുക്കിയിരിക്കുന്നു. ഈ ബിഗ് ബജറ്റ് ചിത്രം ഗോകുലം മൂവീസാണ് നിർമ്മിച്ചിരിക്കുന്നത്. വിഷു റിലീസുകളിലും മികച്ച പ്രകടനം കാഴ്ചവച്ചു കമ്മാര സംഭവം മുന്നേറുകയാണ്..