ത്രീഡിയിലൊരുക്കിയ ആക്ഷൻ വിസ്മയം; കൈതി ഹിന്ദി റീമേക്കുമായി അജയ് ദേവ്‌ഗൺ; ഭോലാ പുതിയ ടീസർ കാണാം

തമിഴ് യുവ താരം കാർത്തിയെ നായകനാക്കി പ്രശസ്ത സംവിധായകൻ ലോകേഷ് കനകരാജ് ഒരുക്കിയ ചിത്രമാണ് കൈതി. ബ്ലോക്ക്ബസ്റ്റർ വിജയം നേടിയ ഈ ചിത്രത്തിന്റെ ഹിന്ദി റീമേക് ഇപ്പോൾ റിലീസിനൊരുങ്ങുകയാണ്. ബോളിവുഡ് സൂപ്പർ താരം അജയ് ദേവ്‌ഗൺ നായകനായി എത്തുന്ന കൈതി ഹിന്ദി റീമേക്കിന്റെ പേര് ഭോലാ എന്നാണ്. നേരത്തെ ഇതിന്റെ ഒരു ടീസർ റിലീസ് ചെയ്യുകയും വലിയ ശ്രദ്ധ നേടുകയും ചെയ്തിരുന്നു. ഇപ്പോഴിതാ ഈ ചിത്രത്തിന്റെ രണ്ടാമത്തെ ടീസർ കൂടി പുറത്തു വന്നിരിക്കുകയാണ്. ഗംഭീര ആക്ഷൻ സീനുകൾ നിറഞ്ഞ ഈ ചിത്രം ത്രീഡിയിൽ ആണ് ഒരുക്കിയതെന്ന പ്രത്യേകതയുമുണ്ട്. അജയ് ദേവ്‌ഗൺ തന്നെ സംവിധാനവും ചെയ്തിരിക്കുന്ന ഈ ചിത്രം ഈ വരുന്ന മാർച്ച് മുപ്പതിനാണ് ആഗോള റിലീസായി എത്തുക. അജയ് ദേവ്‌ഗൺ സംവിധാനം ചെയ്ത നാലാമത്തെ ചിത്രമാണ് ഭോല. യു മീ ഓർ ഹം, ശിവായ്, റൺവേ 34 എന്നിവയാണ് അജയ് ദേവ്‌ഗൺ നേരത്തെ സംവിധാനം ചെയ്തിട്ടുള്ള ചിത്രങ്ങൾ.

ടി സീരിസ്, റിലയൻസ് എന്റർടെയ്ൻമെന്റ്, ഡ്രീം വാരിയേഴ്സ് പിക്ചേഴ്സ്, അജയ് ദേവ്‌ഗൺ എന്നിവർ ചേർന്ന് നിർമ്മിക്കുന്ന ഈ ചിത്രത്തിൽ തബുവും ഒരു പ്രധാന വേഷം ചെയ്യുന്നുണ്ട്. കൈതിയിൽ നരെയ്ൻ അവതരിപ്പിച്ച ബിജോയ് എന്ന കഥാപാത്രത്തിന് പകരമാണ് ഭോലയിൽ തബു എത്തുന്നത്. ദീപക് ദൊബരിയൽ, ഗജ്‌രാജ് റാവു, സഞ്ജയ് മിശ്ര എന്നിവരും ഈ ചിത്രത്തിൽ അഭിനയിക്കുന്നുണ്ട്. കമൽ ഹാസൻ നായകനായ വിക്രം എന്ന ചിത്രത്തിലൂടെ ലോകേഷ് കനകരാജ് കൈതിയെ ലോകേഷ് സിനിമാറ്റിക് യൂണിവേഴ്സിന്റെ ഭാഗമാക്കിയിരുന്നു. അടുത്ത വർഷം കൈതി രണ്ടാം ഭാഗവുമായി എത്താനുള്ള ഒരുക്കത്തിലാണ് ലോകേഷ്- കാർത്തി ടീം. അത്കൊണ്ട് തന്നെ ഭോലക്കും രണ്ടാം ഭാഗം ആരാധകർ പ്രതീക്ഷിക്കുന്നുണ്ട്.