പത്തു വർഷം മുൻപ് പൊന്നാടയണിയിച്ച ആളെ അങ്ങനെ മറക്കാൻ പറ്റോ; രസകരമായ ടീസറുമായി സത്യൻ അന്തിക്കാടിന്റെ മകൾ..!

സൂപ്പർ ഹിറ്റ് സംവിധായകൻ സത്യൻ അന്തിക്കാട് ഒരുക്കിയ ഏറ്റവും പുതിയ ചിത്രമാണ് മകൾ. ഒരിടവേളക്ക് ശേഷം സത്യൻ അന്തിക്കാട്- ജയറാം ടീം ഒന്നിക്കുന്ന ഈ ചിത്രം രചിച്ചിരിക്കുന്നത് ഡോക്ടർ ഇക്ബാൽ കുറ്റിപ്പുറം ആണ്. ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ കുറച്ചു ദിവസം മുൻപ് റിലീസ് ചെയ്യുകയും പ്രേക്ഷക ശ്രദ്ധ നേടുകയും ചെയ്തിരുന്നു. ഇപ്പോഴിതാ ഈ ചിത്രത്തിന്റെ ആദ്യ ടീസർ കൂടി പുറത്തു വന്നിരിക്കുകയാണ്. വളരെ രസകരമായി ഒരുക്കിയിരിക്കുന്ന ഈ ടീസറിലൂടെ ചിത്രത്തിന്റെ താരനിരയിൽ ആരോക്കെ ഉണ്ടെന്നും വെളിപ്പെടുത്തുന്നു. ജയറാം, മീര ജാസ്മിൻ, ദേവിക സഞ്ജയ് എന്നിവർ പ്രധാന വേഷം ചെയ്യുന്ന ഈ ചിത്രത്തിൽ ശ്രീനിവാസൻ, സിദ്ദിഖ്, ഇന്നസെന്റ്, നസ്ലെൻ, അൽത്താഫ് സലിം, ജയശങ്കർ, ഡയാന ഹമീദ്, മീര നായർ, ശ്രീധന്യ, നിൽജ ബേബി, ബാലാജി മനോഹർ എന്നിവരും അഭിനയിച്ചിരിക്കുന്നു.

സെൻട്രൽ പ്രൊഡക്ഷൻസ് നിർമ്മിക്കുന്ന ഈ ചിത്രത്തിന് പ്രശസ്ത ഛായാഗ്രാഹകൻ എസ് കുമാർ ആണ് കാമറ ചലിപ്പിച്ചത്. ഈ ചിത്രം എഡിറ്റ് ചെയ്തിരിക്കുന്നത് കെ രാജഗോപാൽ, ഇതിലെ ഗാനങ്ങൾക്ക് ഈണം പകർന്നിരിക്കുന്നത് വിഷ്ണു വിജയ് എന്നിവരാണ്. ഈ ചിത്രത്തിന് പശ്ചാത്തല സംഗീതം ഒരുക്കിയിരിക്കുന്നത് രാഹുൽ രാജ് ആണ്. അച്ചുവിന്റെ ‘അമ്മ, രസതന്ത്രം, വിനോദയാത്ര, ഇന്നത്തെ ചിന്താവിഷയം, എന്നിവക്ക് ശേഷം സത്യൻ അന്തിക്കാട്- മീര ജാസ്മിൻ ടീം വീണ്ടും ഒന്നിക്കുന്നു എന്നതും, ഞാൻ പ്രകാശന് ശേഷം ദേവിക സഞ്ജയ് വീണ്ടും ഒരു സത്യൻ അന്തിക്കാട് ചിത്രത്തിലൂടെ എത്തുന്നു എന്നതും പ്രേക്ഷകരുടെ പ്രതീക്ഷ വർധിപ്പിക്കുന്ന ഘടകങ്ങൾ ആണ്.