അല്ലു അർജുൻ ആരാധകർക്കായി ഒരു കിടിലൻ ഗാനം കൂടി; സോഷ്യൽ മീഡിയയിൽ തരംഗമായി ആണ്ടവ ആണ്ടവ

സ്റ്റൈലിഷ് സ്റ്റാർ അല്ലു അർജുൻ നായകനായി എത്തുന്ന പുതിയ ചിത്രമാണ് അല വൈകുണ്ഠപുറംലോ. അങ്ങ് വൈകുണ്ഠപുരത്തു എന്ന പേരിൽ മലയാളത്തിലും ഈ ചിത്രം റിലീസ് ചെയ്യുന്നുണ്ട്. അല്ലു അർജുന്റെ അച്ഛൻ ആയി മലയാളികളുടെ പ്രീയപ്പെട്ട താരം ജയറാം അഭിനയിക്കുന്ന ഈ ചിത്രത്തിൽ പ്രശസ്ത നടി തബുവും ഒരു നിർണ്ണായക വേഷം ചെയ്യുന്നു. ജനുവരിയിൽ റിലീസ് ചെയ്യാൻ പോകുന്ന ഈ ചിത്രത്തിലെ രാമുലോ എന്ന തെലുങ്കു ഗാനത്തിന്റെ ലിറിക് വീഡിയോ സൂപ്പർ ഹിറ്റായിരുന്നു. ഇപ്പോഴിതാ ആ ഗാനത്തിന്റെ മലയാളം ലിറിക് വീഡിയോ കൂടി റിലീസ് ചെയ്തിരിക്കുകയാണ്. ആണ്ടവ ആണ്ടവ എന്ന ഈ ഗാനം ഇപ്പോൾ സോഷ്യൽ മീഡിയയുടെ ശ്രദ്ധ നേടുകയാണ്.

അല്ലു അർജുന്റെ ഹാഫ് കോട്ട് ഡാൻസ് സ്റ്റെപ് ആയിരിക്കും ഈ ഗാനത്തിന്റെ ഹൈലൈറ്റ് എന്നാണ് സൂചന. അല്ലു അർജുന്റെ ഡാൻസ് ഇഷ്ട്ടപെടുന്നവർക്കു ആടി തിമിർക്കാനുള്ള ഗാനം ആയിരിക്കും ഇതെന്ന സൂചനയാണ് ഈ ഗാനം നമ്മുക്ക് തരുന്നത്. ഇതിന്റെ മലയാളം വേർഷൻ പാടിയിരിക്കുന്നത് ഹനുമാന്, നയന എന്നിവർ ആണ്. ഹരിനാരായണൻ ബി കെ മലയാളം വരികൾ എഴുതിയ ഈ ഗാനത്തിന് സംഗീതം നൽകിയിരിക്കുന്നത് തമൻ എസ് ആണ്. പൂജ ഹെഗ്‌ഡെ, നിവേദ പെതുരാജ് എന്നിവർ ആണ് ഈ ചിത്രത്തിലെ നായികമാർ ആയി എത്തുന്നത്. പ്രശസ്ത സംവിധായകനായ ത്രിവിക്രം ശ്രീനിവാസ് രചനയും സംവിധാനവും നിർവഹിച്ച ഈ ചിത്രത്തിൽ നവദീപ്, സുശാന്ത്, സത്യരാജ്, സമുദ്രക്കനി, സുനിൽ, രാജേന്ദ്ര പ്രസാദ്, ബ്രഹ്മാജി, ഹർഷ വർധന, സച്ചിൻ കടേക്കർ, നാസ്സർ, വെണ്ണല കിഷോർ എന്നിവരും അഭിനയിച്ചിരിക്കുന്നു.