എല്ലാവരും പറയുമ്പോൾ ഞാനതിനു വേണ്ടി ശ്രമിച്ചു കൊണ്ടേയിരിക്കുന്നു; ദൃശ്യത്തിന്റെ രണ്ടാം ഭാഗത്തെ കുറിച്ച് മനസ്സ് തുറന്നു ജീത്തു ജോസഫ്

മലയാള സിനിമയിലെ ബോക്സ് ഓഫിസ് സമവാക്യങ്ങൾ തിരുത്തി എഴുതിയ ചിത്രമാണ് മോഹൻലാൽ- ജീത്തു ജോസഫ് ടീം ഒരുക്കിയ ദൃശ്യം. മലയാളത്തിലെ ആദ്യത്തെ അമ്പതു കോടി കളക്ഷൻ നേടിയ ചിത്രം മാത്രമല്ല ദൃശ്യം. മലയാള സിനിമ കേരളത്തിന് പുറത്തും വിദേശത്തുമെല്ലാം ഒരേപോലെ സ്വീകരിക്കപ്പെടുന്നത് ആദ്യമായി നമ്മുക്ക് കാണിച്ചു തന്ന ചിത്രം കൂടിയാണ് ദൃശ്യം. ഇതിനോടകം സിംഹളീസ്, ചൈനീസ് ഭാഷകളിൽ അടക്കം ആറു ഭാഷകളിലേക്ക് റീമേക് ചെയ്യപ്പെട്ട ആദ്യ ഇന്ത്യൻ ചിത്രം കൂടിയാണ് ദൃശ്യം. എന്നാൽ ദൃശ്യത്തിന് ഒരു രണ്ടാം ഭാഗം വരുമോ എന്ന ചോദ്യം ആരാധകരിൽ നിന്നും സിനിമാ പ്രേമികളിൽ നിന്നും ജീത്തു ജോസഫ് നേരിടാൻ തുടങ്ങിയിട്ട് കുറച്ചു നാളായി. ഇപ്പോഴിതാ മനോരമ ചാനലിലെ നേരെ ചൊവ്വേ എന്ന പരിപാടിയിൽ അതിനെ കുറിച്ച് മനസ്സ് തുറക്കുകയാണ് ജീത്തു ജോസഫ്.

ദൃശ്യത്തിന് രണ്ടാം ഭാഗം ഉണ്ടാകുമോ എന്നത് വളരെ കുഴപ്പിക്കുന്ന ഒരു ചോദ്യമാണ് എന്നാണ് ജീത്തു ജോസഫ് പറയുന്നത്. ശ്യാം എന്നൊരു ചെറുപ്പക്കാരൻ സോഷ്യൽ മീഡിയയിൽ എഴുതിയിട്ട ദൃശ്യം രണ്ടാം ഭാഗം എന്ന കഥ താൻ വായിച്ചു എന്നും അത് നന്നായിട്ടുണ്ട് എന്നും പറഞ്ഞ ജീത്തു ജോസഫ്, എന്നാൽ അത് വെച്ച് ദൃശ്യത്തിന് ഒരു രണ്ടാം ഭാഗം ഒരുക്കാൻ പ്ലാൻ ഇല്ല എന്ന് പറയുന്നു. എന്നാൽ കഥയിലെ ജോർജുകുട്ടി ഇപ്പോഴും പിടിക്കപ്പെട്ടിട്ടില്ല എന്നും കേസ് ഇപ്പോഴും നടക്കുകയാണ് എന്നത് കൊണ്ട് ദൃശ്യത്തിന് ഒരു രണ്ടാം ഭാഗം ഒരുങ്ങാനുള്ള സാധ്യത തള്ളി കളയാൻ ആവില്ല എന്നും അദ്ദേഹം പറയുന്നു. അതിനുള്ള സാധ്യത താൻ അന്വേഷിക്കുകയാണ് എന്നും അതത്ര ഈസി അല്ല എന്നും അദ്ദേഹം പറഞ്ഞു. ഒരുപാട് സങ്കീർണ്ണമായ ഒരു കഥാ പശ്ചാത്തലം ആണ് ദൃശ്യത്തിന്റേതു എന്നും അത് കൊണ്ട് തന്നെ പല രീതിയിൽ ആലോചിച്ചു ദൈവം സഹായിച്ചു തനിക്കു കൃത്യമായ ഒരു ഓപ്പണിങ് കിട്ടിയാൽ രണ്ടാം ഭാഗം ഉണ്ടായേക്കാം എന്നും ജീത്തു പറയുന്നു.