അന്ന ബെന്നിന് പകരം അനിഖ സുരേന്ദ്രൻ; ‘കപ്പേള’ തെലുങ്ക് റീമേക്ക് ടീസർ കാണാം

റോഷൻ മാത്യു, ശ്രീനാഥ് ഭാസി, അന്ന ബെൻ എന്നിവരെ കേന്ദ്ര കഥാപാത്രങ്ങളാക്കി മുഹമ്മദ് മുസ്തഫ തിരക്കഥയെഴുതി സംവിധാനം ചെയ്ത ‘കപ്പേള’ തെലുങ്ക് റീമേക്കിനൊരുങ്ങുന്നു. അനിഖ സുരേന്ദ്രൻ നായികയായെത്തുന്ന ചിത്രത്തിന് ‘ബുട്ട ബൊമ്മ’ എന്നാണ് പേരിട്ടിരിക്കുന്നത്. ചിത്രത്തിന്റെ ടീസർ പുറത്തുവിട്ടിട്ടുണ്ട്. സ്വാതി എന്ന പേരിലാണ് അനിഖ എത്തുന്ന ചിത്രത്തിൽ ശ്രീനാഥ് ഭാസി അവതരിപ്പിച്ച കഥാപാത്രത്തെ അർജുൻ ദാസും റോഷൻ മാത്യുവിന്റെ വേഷം സൂര്യ വിശിഷ്ടയും പുനരവതരിപ്പിക്കുന്നു. ഷൗരി ചന്ദ്രശേഖറാണ് ചിത്രം സംവിധാനം ചെയ്യുന്നത്. അനിഖയുടെ തെലുങ്ക് അരങ്ങേറ്റ ചിത്രത്തിന് ഗോപി സുന്ദർ സം​ഗീതം പകരുന്നു. ‘സിതാര എൻറർടെയ്‍ൻമെൻറ്സ്’ആണ് ചിത്രം റീമേക്ക് ചെയ്യുന്നത്.

‘കപ്പേള’ കണ്ട പ്രേക്ഷകർക്കുള്ള 1.05 മിനിറ്റ് ദൈർഘ്യമുള്ള ‘ബുട്ട ബൊമ്മ’യുടെ ടീസറിന് കൗതുകമുണർത്താൻ സാധിച്ചിട്ടുണ്ട്. 2020 മാർച്ച് 6 ന് പുറത്തെത്തിയ മലയാള ചിത്രം ‘കപ്പേള’ നടൻ മുഹമ്മദ് മുസ്‍തഫ ആദ്യമായി സംവിധാന നിർവ്വഹിച്ച ചിത്രമാണ്. ‘കഥാസ് അൺടോൾഡ്’ൻറെ ബാനറിൽ വിഷ്‍ണു വേണു നിർമ്മിച്ച ‘കപ്പേള’യിലെ ‘ജെസ്സി’ എന്ന നായികാ കഥാപാത്രത്തെ അവതരിപ്പിച്ചതിന് മികച്ച നടിക്കുള്ള സംസ്ഥാന ചലച്ചിത്ര അവാർഡ് അന്ന ബെന്നിന് ലഭിച്ചിരുന്നു. ജിംഷി ഖാലിദ് ഛായാഗ്രഹണം നിർവ്വഹിച്ച ചിത്രത്തിന് സുഷിൻ ശ്യാമാണ് സം​ഗീതം പകർന്നത്. തമിഴിലേക്കും റീമേക്ക് ചെയ്യപ്പെടുന്ന ചിത്രത്തിന്റെ തമിഴ് റീമേക്കവകാശം സംവിധായകൻ ഗൗതം മേനോനാണ് സ്വന്തമാക്കിയിരിക്കുന്നത്.

അല്ലു അർജുന്റെ ‘അല വൈകുണ്ഠപുരം ലോ’, നാനിയുടെ ‘ജേഴ്‍സി’ എന്നീ ചിത്രങ്ങൾ നിർമ്മിച്ച തെലുങ്കിലെ പ്രമുഖ നിർമ്മാണ കമ്പനിയാണ് ‘സിതാര എൻറർടെയ്‍ൻമെൻറ്സ്’. ‘അയ്യപ്പനും കോശിയും’, ‘പ്രേമം’ എന്നീ മലയാള ചിത്രങ്ങളുടെ തെലുങ്ക് റീമേക്കിന്റെ അവകാശവും ഇവർ തന്നെയാണ് സ്വന്തമാക്കിയിരിക്കുന്നത്.