ഇരട്ട വേഷത്തിൽ ജോജു ജോർജ്; ഞെട്ടിക്കാൻ ‘ഇരട്ട’; ട്രെയ്‌ലർ കാണാം

പ്രശസ്ത നടൻ ജോജു ജോർജ്ജ് ആദ്യമായി ഇരട്ട വേഷത്തിലെത്തുന്ന ചിത്രമാണ് ഇരട്ട. നവാഗതനായ രോഹിത് എം.ജി. കൃഷ്ണൻ സംവിധാനം ചെയ്ത ഈ ചിത്രത്തിൽ വിനോദ്, പ്രമോദ് എന്നീ രണ്ട് ഇരട്ട സഹോദരമാരായിട്ടാണ് ജോജു അഭിനയിക്കുന്നത്. തമിഴ്- മലയാള സിനിമകളിലൂടെ ശ്രദ്ധേയയായ അഞ്ജലിയാണ് ഈ ചിത്രത്തിലെ നായികാ വേഷം ചെയ്യുന്നത്. ജോജു ജോർജിന്റെ ഉടമസ്ഥതയിലുള്ള അപ്പു പാത്തു പാപ്പു പ്രൊഡക്ഷൻസും മാർട്ടിൻ പ്രക്കാട്ട് ഫിലിംസും സിജോ വടക്കനും ചേർന്ന് നിർമ്മിക്കുന്ന ഈ ചിത്രം ഫെബ്രുവരി രണ്ടിന് ആണ് റിലീസ് ചെയ്യുക. ഇന്നിപ്പോൾ ഈ ചിത്രത്തിന്റെ ട്രയ്ലറും റീലീസ് ചെയ്തിരിക്കുകയാണ്. പ്രേക്ഷകരെ ആകാംഷാഭരിതരാക്കുന്ന തരത്തിലാണ് ഈ ട്രയ്ലർ ഒരുക്കിയിരിക്കുന്നത്.

ശ്രീന്ദ, ആര്യ സലിം, ശ്രീകാന്ത് മുരളി, സാബുമോൻ, അഭിരാം, ശരത് സഭ, ഷെബിൻ ബെന്സന്, ശ്രീജ, ജിത്തു അഷ്‌റഫ് എന്നിവരും വേഷമിടുന്ന ഈ ചിത്രത്തിന് ക്യാമറ ചലിപ്പിച്ചത് വിജയ് ആണ്. ജേക്‌സ് ബിജോയ് സംഗീത സംവിധാനം നിർവഹിച്ച ഈ ചിത്രത്തിലെ ഗാനങ്ങൾക്ക് വരികൾ രചിച്ചത് അൻവർ അലിയാണ്. മനു ആന്റണിയാണ് ഈ ചിത്രത്തിന്റെ എഡിറ്റർ. കെ രാജശേഖർ ആണ് ഈ ചിത്രത്തിന് സംഘട്ടനം ഒരുക്കിയത്. ഓൾ ഇന്ത്യ തലത്തിൽ ശ്രദ്ധ നേടിയ നായാട്ടിന് ശേഷം ജോജു ജോർജ്- മാർട്ടിൻ പ്രക്കാട്ട് ടീം ഒന്നിക്കുന്ന ചിത്രം കൂടിയാണിത്. സഹോദരൻമാർ തമ്മിലുള്ള പ്രശ്നങ്ങളും ഒരു കേസ് അന്വേഷണവുമാണ് ഈ ചിത്രത്തിലൂടെ അവതരിപ്പിക്കുന്നതെന്ന സൂചനയാണ് ട്രെയ്‌ലർ നൽകുന്നത്. സംവിധായകൻ തന്നെയാണ് ഈ ചിത്രം രചിച്ചിരിക്കുന്നത്. മാർട്ടിൻ പ്രക്കാട്ട്, സൂരജ്, നീരജ് എന്നിവരും രചനാ പങ്കാളികൾ ആയി ഈ ചിത്രത്തിൽ പ്രവർത്തിച്ചിട്ടുണ്ട്.