വീണ്ടും പ്രേക്ഷകരെ ഹാപ്പിയാക്കി മുകേഷ്- ഉർവശി ടീം; ധമാക്കയിലെ ഹാപ്പി സോങ് എത്തി

പ്രശസ്ത സംവിധായകൻ ഒമർ ലുലു ഒരുക്കിയ ധമാക്ക എന്ന ചിത്രത്തിലെ ആദ്യ ഗാനം ഇന്ന് റീലീസ് ചെയ്തു. ഹാപ്പി വെഡിങ്സ്, ചങ്ക്‌സ്, ഒരു അഡാർ ലവ് എന്നീ മൂന്നു ചിത്രങ്ങൾക്കു ശേഷം ഒമർ ലുലു ഒരുക്കിയ ഈ ചിത്രത്തിന് വേണ്ടി സംഗീത സംവിധാനം നിർവഹിച്ചിരിക്കുന്നത് ഗോപി സുന്ദർ ആണ്. അദ്ദേഹം ഒരുക്കിയ ഹാപ്പി ഹാപ്പി നമ്മൾ ഹാപ്പി എന്നു തുടങ്ങുന്ന ഒരു അടിപൊളി കല്യാണ ഗാനം ആണ് ഇപ്പോൾ റിലീസ് ചെയ്തിരിക്കുന്നത്. ആ ഗാനത്തിന് വളരെ മനോഹരമായ, കളർഫുൾ ആയ ദൃശ്യാവിഷ്കാരം ആണ് ഒമർ ലുലു നൽകിയിരിക്കുന്നത്. എല്ലാത്തരം പ്രേക്ഷകരെയും ആകർഷിക്കുന്ന രീതിയിൽ ആണ് ഈ ഗാനം അദ്ദേഹം നമ്മുടെ മുന്നിൽ എത്തിച്ചിരിക്കുന്നത്.

നായകനായ അരുൺ, നായികയായ നിക്കി ഗല്റാണി എന്നിവർക്കൊപ്പം നിന്നു ഈ ഗാനത്തിൽ തകർത്തു നൃത്തം വെച്ചിരിക്കുന്നത് പ്രേക്ഷകരുടെ പ്രീയപ്പെട്ട അഭിനേതാക്കളായ മുകേഷും ഉർവശിയും ആണ്. പ്രായം മറന്നു കൊണ്ട് അസാമാന്യമായ എനർജിയോടെ ആണ് ഇരുവരും ഈ ഗാനരംഗത്ത് പ്രത്യക്ഷപ്പെട്ടിരിക്കുന്നത്. ഇവരുടെ പ്രകടനം ആണ് ഈ ഗാന രംഗത്തിന്റെ ഹൈലൈറ്റ് എന്നു പറയാം. ബി കെ ഹരിനാരായണൻ വരികൾ എഴുതിയിരിക്കുന്ന ഈ ഗാനം ആലപിച്ചിരിക്കുന്നത് അശ്വിൻ വിജയൻ, അഫ്‌സൽ, സച്ചിൻ രാജ്, സിതാര കൃഷ്ണകുമാർ, ശ്വേത എന്നിവർ ചേർന്നാണ്.

മേൽ പറഞ്ഞ അഭിനേതാക്കൾക്കോപ്പം ധർമജൻ ബോൾഗാട്ടി, ഇടവേള ബാബു, ഇന്നസെന്റ്, ശാലിൻ സോയ, നേഹ സക്സേന എന്നിവരും ഈ ഗാന രംഗത്തിൽ ഉണ്ട്. എം കെ നാസർ ആണ് ഈ എന്റർടൈനേർ നിർമ്മിച്ചിരിക്കുന്നത്. തന്റെ മുൻ ചിത്രങ്ങളിലൂടെ സോഷ്യൽ മീഡിയയിൽ തരംഗം സൃഷ്ടിച്ച ഒമർ ലുലു ധമാക്കയും ഒരു വലിയ വിജയമാക്കും എന്നു തന്നെയാണ് ഏവരും പ്രതീക്ഷിക്കുന്നത്. സിനോജ് പി അയ്യപ്പൻ ഛായാഗ്രഹണം നിർവഹിച്ചിരിക്കുന്ന ഈ ചിത്രം എഡിറ്റ് ചെയ്തിരിക്കുന്നത് ദിലീപ് ഡെന്നിസ് ആണ്. സാരംഗ് ജയപ്രകാശ്, വേണു ഒ വി, കിരൺ ലാൽ എന്നിവർ ചേർന്നാണ് ഈ ചിത്രത്തിന്റെ തിരക്കഥ രചിച്ചിരിക്കുന്നത്. ഇതിന്റെ കഥ സംവിധായകൻ ഒമർ ലുലുവിന്റെ തന്നെയാണ്.