‘ഫുൾ ഓൺ ആണേ’; പത്രോസിന്റെ പടപ്പുകളിലെ പുതിയ ഗാനം പുറത്തിറങ്ങി!

‘തണ്ണീർമത്തൻ ദിനങ്ങൾ’ എന്ന ബ്ലോക്ക്‌ബസ്റ്റർ ചിത്രത്തിന്റെ സഹ എഴുത്തുകാരനായ ഡിനോയ്‌ പൗലോസിന്റെ രചനയിൽ നവാഗതനായ അഫ്‌സൽ അബ്ദുൽ ലത്തീഫ് സംവിധാനം ചെയ്യുന്ന‌ പുതിയ ചിത്രമാണ് ‘പത്രോസിന്റെ പടപ്പുകള്‍’. ജനപ്രിയ ടിവി പരമ്പരയായ ഉപ്പും മുളകിന്റെ രചയിതാവ് കൂടിയാണ് അഫ്‌സൽ അബ്ദുൽ ലത്തീഫ്. ഈ ചിത്രത്തിലെ ഫുൾ ഓൺ ആണേ എന്ന് തുടങ്ങുന്ന രണ്ടാമത്തെ ഗാനം ഇപ്പോൾ പുറത്തുവിട്ടിരിക്കുകയാണ് അണിയറപ്രവർത്തകർ. ജെയ്ക്സ്‌ ബിജോയ് സംഗീതം നൽകി ജാസി ​ഗിഫ്റ്റ് പാടിയിരിക്കുന്ന ഗാനത്തിന് വരികൾ എഴുതിയിരിക്കുന്നത് ശബരീഷ് വർമ്മയും ടിറ്റോ പി തങ്കച്ചനും ചേർന്നാണ്. ജേക്സ് ബിജോയും ​ഗാനത്തിൽ ആലപിച്ചിട്ടുണ്ട്. പത്രോസും മക്കളും അമ്മച്ചിയുമടങ്ങുന്ന കുടുംബത്തിന്റെ വിശേഷങ്ങളും നുറുങ്ങു തമാശകളുമെല്ലാം ഈ ഗാനരംഗത്തിൽ.

‘തണ്ണീര്‍മത്തന്‍ ദിനങ്ങളു’ടെ വമ്പൻ വിജയത്തിന് ശേഷം ഡിനോയ് പൗലോസ് സ്വതന്ത്രമായി തിരക്കഥ ഒരുക്കുന്ന ചിത്രത്തിൽ ‌ഡിനോയ്‌ പൗലോസിനൊപ്പം റഫുദീൻ, നസ്‌ലീൻ, ശബരീഷ് വർമ്മ,‌ രഞ്ജിത മേനോൻ, ഗ്രേയ്‌‌സ് ആന്റണി, ജെയിംസ്‌ ഏലിയ, ജോണി ആന്റണി, സുരേഷ് കൃഷ്ണ, നന്ദു തുടങ്ങിയവരും ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നു. എറണാകുളം, വൈപ്പിൻ പശ്ചാത്തലത്തിൽ നർമ്മത്തിന്റെ മേമ്പൊടിയോടെ അവതരിപ്പിക്കുന്ന ഈ കുടുംബ ചിത്രം മാർച്ച് 18ന് തിയേറ്ററുകളിൽ റീലീസ് ചെയ്യുന്നു. മരിക്കാർ എൻ്റർടെയ്ൻമെൻസിൻ്റെ ബാനറിൽ ഒരുങ്ങുന്ന ചിത്രത്തിന്റെ ഛായാഗ്രഹണം ജയേഷ് മോഹൻ, എഡിറ്റിങ് ആൻഡ് ക്രീയേറ്റീവ് ഡയറക്ഷൻ സംഗീത് പ്രതാപും നിർവഹിക്കുന്നു.