തവളച്ചാട്ടം ചാടാനാണെങ്കിൽ ഇവടെ ചാടിയാൽ പോരെ മനുഷ്യാ, അങ്ങു ആഫ്രിക്കയിൽ പോയി ചാടണോ; വൈറലായി ദിലീഷ് പോത്തന്റെ പുതിയ വീഡിയോ..!

മലയാള സിനിമയിലെ പുതു തലമുറയിലെ സംവിധായകരിൽ ഏറ്റവും പ്രശസ്തനായ ഒരാളാണ് ദിലീഷ് പോത്തൻ. അദ്ദേഹം സംവിധാനം ചെയ്ത രണ്ടു ചിത്രങ്ങൾക്കും ദേശീയ തലത്തിൽ വരെ അംഗീകാരം നേടിയെടുക്കാൻ കഴിഞ്ഞു. സംവിധായകനെന്നതിലുപരി ഒരു മികച്ച നടനായും ദിലീഷ് പോത്തൻ കേരളത്തിൽ പ്രശസ്തനാണ്. ഇപ്പോഴിതാ തന്റെ ഇൻസ്റ്റാഗ്രാമിൽ ദിലീഷ് പോത്തൻ പങ്കു വെച്ച വീഡിയോയാണ് സോഷ്യൽ മീഡിയയുടെ ശ്രദ്ധ നേടുന്നത്. ആഫ്രിക്കയിലെ ഒരു ബീച്ചിൽ വെച്ചെടുത്ത ഫോട്ടോകളും വീഡിയോകളുമാണ് അദ്ദേഹം പങ്കു വെച്ചിരിക്കുന്നത്. അതിൽ ദിലീഷ് പോത്തൻ കടലിലേക്ക് ചാടുന്ന ഒരു വീഡിയോയുമുണ്ട്. അതിനു താഴെ പ്രശസ്ത സംവിധായകൻ മിഥുൻ മാനുവൽ തോമസ് ഇട്ടിരിക്കുന്ന കമന്റും പൊട്ടിച്ചിരി പടർത്തുന്ന ഒന്നാണ്.

ദിലീഷ് പോത്തൻ വെള്ളത്തിലേക്കു ചാടുന്ന വീഡിയോക്ക് താഴെ മിഥുൻ മാനുവൽ തോമസ് പറയുന്നത്, തവളച്ചാട്ടം ചാടാനാണെങ്കിൽ ഇബടെ ചാടിയാൽ പോരെ മനുഷ്യാ, അങ്ങു ആഫ്രിക്കയിൽ പോയി ചാടണോ എന്നാണ്. അതിനു ദിലീഷ് പോത്തൻ നൽകിയിരിക്കുന്ന മറുപടിയും രസകരമാണ്. യശോദേ എന്ന വാക്കാണ് ദിലീഷ് പോത്തൻ മറുപടിയായി ഇട്ടിരിക്കുന്നത്. സൂപ്പർ ഹിറ്റ് ജയറാം -രാജസേനൻ ചിത്രമായ മേലെപ്പറമ്പിൽ ആണ് വീട്ടിലെ ഒരു ഹാസ്യ രംഗത്തിൽ ജഗതി ശ്രീകുമാർ അവതരിപ്പിക്കുന്ന കഥാപാത്രം കുളത്തിലേക്കു ചാടുമ്പോൾ പറയുന്ന ഡയലോഗ് ആണ് യശോദേ എന്നത്. ഉപ്പും മുളകും എന്ന സൂപ്പർ ഹിറ്റ് സീരിയൽ സംവിധാനം ചെയ്ത എസ് ജെ സിനു സംവിധാനം ചെയ്യുന്ന ജിബൂട്ടി എന്ന ചിത്രത്തിന്റെ ഷൂട്ടിങ്ങിനാണ് ദിലീഷ് പോത്തൻ ആഫ്രിക്കയിൽ പോയത്. ജനവാസം തീരെ കുറവായ കിഴക്കേ ആഫ്രിക്കയിലെ ജിബൂട്ടി എന്ന സ്ഥലത്താണ് ഈ ചിത്രം ഷൂട്ട് ചെയ്തത്.