നോ വയലൻസ് ഒൺലി പീസ്, ജനപ്രിയ നായകന്റെ മൈ സാന്റാ ട്രൈലെർ എത്തി; ഗംഭീര പ്രതികരണവുമായി സോഷ്യൽ മീഡിയ

ജനപ്രിയ നായകൻ ദിലീപ് നായകനായി എത്തുന്ന മൈ സാന്റാ എന്ന ചിത്രത്തിന്റെ ട്രൈലെർ ഇന്ന് റിലീസ് ആയി. സുഗീത് സംവിധാനം ചെയ്ത ഈ ചിത്രം ക്രിസ്മസ് റിലീസ് ആയി ഡിസംബർ 20 നു പ്രദർശനത്തിന് എത്തും എന്നാണ് സൂചന. ഇന്ന് രാവിലെ പത്തു മണിക്ക് റിലീസ് ചെയ്ത ഇതിന്റെ ട്രൈലറിന് ഗംഭീര പ്രേക്ഷക പ്രശംസയാണ് ലഭിക്കുന്നത്. കുട്ടികളേയും കുടുംബ പ്രേക്ഷകരേയും പൂർണ്ണമായും തൃപ്തിപ്പെടുത്തുന്ന ഒരു ചിത്രം ആയിരിക്കും ഇതെന്ന സൂചനയാണ് ഇന്ന് പുറത്തു വന്ന ട്രൈലെർ നമ്മുക്ക് നൽകുന്നത്. ഒരു സാന്റാ ക്ലോസ് ആയി ദിലീപ് അഭിനയിക്കുന്ന ഈ ചിത്രം പറയുന്നത് ഏഴു വയസുള്ള ഒരു കൊച്ചു പെൺകുട്ടിയും ഒരു ക്രിസ്മസ് അപ്പൂപ്പനും തമ്മിൽ ഉള്ള ബന്ധം ആണ്.

കോമെഡിയും വൈകാരിക മുഹൂർത്തങ്ങളും ഫാന്റസിയും എല്ലാം ചേർത്താണ് ഈ ചിത്രം ഒരുക്കിയിരിക്കുന്നത് എന്നും ഈ ട്രൈലെർ നമ്മോടു പറയുന്നു. നവാഗതനായ ജെമിൻ സിറിയക് തിരക്കഥ രചിച്ച ഈ ചിത്രം വാള്‍ പോസ്റ്റര്‍ എന്റര്‍ടെയ്ൻമെന്റ്സ് എന്ന ബാനറിൽ സംവിധായകൻ സുഗീത്, പ്രശസ്ത രചയിതാവ് നിഷാദ് കോയ, അജീഷ് ഒ.കെ സാന്ദ്ര മരിയ ജോസ് എന്നിവർ ചേർന്ന് ആണ് നിർമ്മിച്ചിരിക്കുന്നത്. സണ്ണി വെയ്ൻ, സിദ്ദിഖ്, സായി കുമാർ, അനുശ്രീ, ധർമജൻ ബോൾഗാട്ടി, ഇന്ദ്രൻസ്, കലാഭവൻ ഷാജോൺ തുടങ്ങി ഒരു വലിയ താര നിര തന്നെ ഈ ചിത്രത്തിൽ അഭിനയിച്ചിട്ടുണ്ട്. വിദ്യ സാഗർ സംഗീതം പകർന്ന ഈ ചിത്രത്തിന് ദൃശ്യങ്ങൾ ഒരുക്കിയത് ഫൈസൽ അലിയും എഡിറ്റിങ് നിർവഹിച്ചത് വി സാജനും ആണ്.