രാജസ്ഥാനി നർത്തകർക്കൊപ്പം നൃത്തം വെച്ച് ജനപ്രിയ നായകൻ; വോയ്സ് ഓഫ് സത്യനാഥൻ വീഡിയോ കാണാം

മലയാള സിനിമയുടെ ജനപ്രിയ നായകൻ ദിലീപ് നായകനായി അഭിനയിക്കുന്ന ഏറ്റവും പുതിയ ചിത്രമാണ് വോയ്സ് ഓഫ് സത്യനാഥൻ. ബാദുഷ സിനിമാസിന്റേയും ഗ്രാന്റ് പ്രൊഡക്‌ഷന്‍സിന്റേയും ബാനറിൽ എൻ.എം. ബാദുഷ, ഷിനോയ് മാത്യു, ദിലീപ്, പ്രിജിൻ ജെ.പി. എന്നിവർ ചെന്ന് നിർമ്മിക്കുന്ന ഈ ബിഗ് ബഡ്ജറ്റ് ചിത്രത്തിന്റെ ഷൂട്ടിങ് ഇപ്പോൾ പുരോഗമിക്കുകയാണ്. വമ്പൻ താരനിരയാണ് ദിലീപിനൊപ്പം ഈ ചിത്രത്തിൽ അണിനിരക്കുന്നത്. ഇപ്പോഴിതാ ഈ ചിത്രത്തിന്റെ രാജസ്ഥാൻ ഷെഡ്യൂളിൽ നിന്നുള്ള ഒരു വീഡിയോ ശ്രദ്ധ നേടുകയാണ്. രാജസ്ഥാനി നർത്തകർക്കൊപ്പം തെരുവിൽ നൃത്തം വെക്കുന്ന ദിലീപിന്റെ വീഡിയോയാണ് ഇപ്പോൾ പുറത്ത് വന്നിരിക്കുന്നത്. ദിലീപിനൊപ്പം ഈ ചിത്രത്തിൽ നായികാ വേഷം ചെയ്യുന്ന വീണ നന്ദകുമാറിനേയും ഈ വീഡിയോയിൽ നമ്മുക്ക് കാണാം.

സൂപ്പർ ഹിറ്റുകളായ പഞ്ചാബി ഹൗസ്, പാണ്ടിപ്പട, ചൈനാടൗൺ, തെങ്കാശിപ്പട്ടണം, റിങ്ങ്മാസ്റ്റർ എന്നിവക്ക് ശേഷം ദിലീപും റാഫിയും വീണ്ടും ഒന്നിക്കുന്ന വോയ്സ് ഓഫ് സത്യനാഥനിൽ മലയാളത്തിന് പുറമെ തമിഴ്, തെലുങ്ക്, ഹിന്ദി സിനിമകളിലെ പ്രമുഖ താരങ്ങളും അഭിനയിക്കുന്നുണ്ട്. തമിഴിൽ നിന്ന് പ്രകാശ് രാജ്, തെലുങ്കിൽ നിന്ന് ജഗപതി ബാബു, ബോളിവുഡിൽ നിന്ന് അനുപം ഖേർ, മകരന്ദ് ദേശ്പാണ്ഡെ, മലയാളത്തിൽ നിന്ന് ജോജു ജോർജ്, സിദ്ധിഖ്, ജോണി ആന്റണി തുടങ്ങിയവരാണ് ഇതിൽ ദിലീപിനൊപ്പം അഭിനയിക്കുന്നത്. റാഫി തന്നെയാണ് ഇതിന്റെ കഥ, തിരക്കഥ, സംഭാഷണം എന്നിവ രചിച്ചത്. ഈ ബിഗ് ബഡ്ജറ്റ് ചിത്രത്തിന് കാമറ ചലിപ്പിക്കുന്നത് ജിതിൻ സ്റ്റാനിലസ്, സംഗീത സംവിധാനം നിർവഹിക്കുന്നത് ജസ്റ്റിൻ വർഗീസ്, എഡിറ്റ് ചെയ്യുന്നത് ഷമീർ മുഹമ്മദ് എന്നിവരാണ്. ക്രിസ്‌മസ്‌ റിലീസായാവും ഈ ചിത്രം പ്രേക്ഷകരുടെ മുന്നിലെത്തുക എന്നാണ് സൂചന.