ആരെങ്കിലും ഒരാളുടെ നിർഭാഗ്യം മതിയായിരുന്നു ആ കാറിനെ താങ്ങി നിർത്തിയ ചരടുകൾ പൊട്ടാൻ; സൂപ്പർ ഹിറ്റ് ചിത്രത്തിലെ അപകടമേറിയ ആ സംഘട്ടനം ചിത്രീകരിച്ചതിങ്ങനെ..!

തമിഴിൽ റിലീസ് ചെയ്തു തെന്നിന്ത്യ മുഴുവൻ തരംഗമായി മാറിയ സൂപ്പർ ഹിറ്റ് ചിത്രമായിരുന്നു ധ്രുവങ്ങൾ പതിനാറു. നവാഗതനായ കാർത്തിക് നരെയ്ൻ രചിച്ചു സംവിധാനം ചെയ്ത ഈ ചിത്രത്തിൽ പ്രശസ്ത തെന്നിന്ത്യൻ താരം റഹ്മാൻ ആണ് നായക വേഷത്തിൽ അഭിനയിച്ചത്. റഹ്മാനോടൊപ്പം പ്രകാശ് വിജയ രാഘവൻ, അശ്വിൻ കുമാർ, പ്രദീപ് തുടങ്ങിയവർ അഭിനയിച്ച ഈ ത്രില്ലർ കേരളത്തിലും വലിയ സ്വീകാര്യതയാണ് നേടിയെടുത്തത്. വളരെ വ്യത്യസ്തമായ രീതിയിലുള്ള കഥ പറച്ചിലിനും മേക്കിങ്ങിനുമൊപ്പം അഭിനേതാക്കളുടെ മികച്ച പ്രകടനവും ഈ ചിത്രത്തിന്റെ മാറ്റ് കൂട്ടി. ഇപ്പോഴിതാ ഈ ചിത്രത്തിലെ വളരെ അപകടകരമായ ഒരു സംഘട്ടന രംഗം എങ്ങനെയാണു ചിത്രീകരിച്ചത് എന്ന് കാണിക്കുന്ന ഒരു മേക്കിങ് വീഡിയോ പങ്കു വെച്ചിരിക്കുകയാണ് ചിത്രത്തിലെ നായകനായ റഹ്മാൻ. അദ്ദേഹം ഡ്യൂപ് ഉപയോഗിക്കാതെയാണ് ഈ രംഗത്തിൽ അഭിനയിച്ചിട്ടുള്ളത്.

ഓരോ രംഗവും ഏറ്റവും സ്വാഭാവികവും റിയലിസ്റ്റിക്കുമായി പ്രേക്ഷകർക്ക് അനുഭവപ്പെടാനാണ് ഇത്രയും അപകട സാധ്യതയുള്ള രംഗങ്ങൾ പോലും ഡ്യൂപ് ഉപയോഗിക്കാതെയും മറ്റും തങ്ങൾ ചെയ്യുന്നത് എന്ന് അദ്ദേഹം സൂചിപ്പിക്കുന്നു. അന്ന് ആ കാറിനുള്ളിൽ സംഘട്ടന രംഗം ചിത്രീകരിക്കാനായി ഇരിക്കുമ്പോൾ താൻ സത്യത്തിൽ പേടിച്ചിരുന്നു എന്നും നമ്മുടെ വിധിയിൽ എന്താണ് അന്ന് പറഞ്ഞിട്ടുള്ളതെന്നു അറിയില്ലല്ലോ എന്നും അദ്ദേഹം പറയുന്നു. അന്നവിടെ പ്രവർത്തിച്ച ആരുടെ ഒരാളുടെയെങ്കിലും നിർഭാഗ്യം മതിയായിരുന്നു ആ കാറിനെ താങ്ങി നിർത്തിയ വയറുകൾ പൊട്ടി പോകാനെന്നും റഹ്മാൻ വിശദീകരിച്ചു. ജി സംഘട്ടന സംവിധാനം നിർവഹിച്ച ആ രംഗത്തിൽ താൻ ഒറ്റയ്ക്ക് ആയിരുന്നില്ല എന്നും, പ്രതിഭാധനനായ പ്രകാശ് വിജയ രാഘവൻ എന്ന നടനും തനിക്കൊപ്പം അന്നാ കാറിൽ ഉണ്ടായിരുന്നുവെന്നും റഹ്മാൻ പറഞ്ഞു. തന്റെ ഫേസ്ബുക് പേജിലൂടെയാണ് റഹ്മാൻ ഈ വീഡിയോ പങ്കു വെച്ചിരിക്കുന്നത്.