ഇരുപത്തിയൊന്നാം നൂറ്റാണ്ടിലെ ആദ്യ ഗാനം എത്തി; മനോഹരമായ ഗാനം ഏറ്റെടുത്തു സോഷ്യൽ മീഡിയ..!

പ്രണവ് മോഹൻലാൽ നായകനായ പുതിയ ചിത്രമായ ഇരുപത്തിയൊന്നാം നൂറ്റാണ്ടിലെ ആദ്യ സോങ് വീഡിയോ ഇന്ന് റിലീസ് ചെയ്തു. അരുൺ ഗോപി രചനയും സംവിധാനവും നിർവഹിച്ച ഈ ചിത്രത്തിന് വേണ്ടി സംഗീതം ഒരുക്കിയിരിക്കുന്നത് ഗോപി സുന്ദർ ആണ്. ആരാരോ ആർദ്രമായ് എന്ന് തുടങ്ങുന്ന മനോഹരമായ ഒരു മെലഡിയാണ് ഇന്ന് ഈ ചിത്രത്തിൽ നിന്ന് റിലീസ് ചെയ്ത ഗാനം. ഒറ്റ കേൾവിയിൽ തന്നെ ശ്രോതാക്കളുടെ മനസ്സിനെ തൊടുന്ന ഈ ഗാനം മനോഹരമായ ദൃശ്യങ്ങളാലും സമ്പന്നമാണ്. അഭിനന്ദം രാമാനുജൻ ഒരുക്കിയ ഗംഭീര വിഷ്വൽസും വിവേക് ഹർഷന്റെ എഡിറ്റിംഗ് മികവും കൂടി ചേർന്നപ്പോൾ മികച്ച ഒരു ദൃശ്യ വിരുന്നു കൂടിയാണ് ഈ ഗാനം പ്രേക്ഷകർക്ക് സമ്മാനിക്കുന്നത്.

പ്രണവ് മോഹൻലാലിനൊപ്പം ഈ ചിത്രത്തിലൂടെ അരങ്ങേറുന്ന പുതുമുഖ നായികയായ സായ ഡേവിഡും ഈ ഗാനത്തിൽ പ്രത്യക്ഷപ്പെടുന്നുണ്ട്. ഒരു പക്കാ ഫാമിലി എന്റെർറ്റൈനെർ ആയാണ് ഈ ചിത്രം ഒരുക്കിയിരിക്കുന്നത്. മുളകുപാടം ഫിലിമ്സിന്റെ ബാനറിൽ ടോമിച്ചൻ മുളകുപാടം നിർമ്മിച്ച ഈ ചിത്രം ഈ വരുന്ന ഇരുപത്തിയഞ്ചാം തീയതി റിലീസ് ചെയ്യും. കേരളത്തിലും ഗൾഫ് രാജ്യങ്ങളിലും ഒരേ ദിവസമാണ് ഈ ചിത്രം റിലീസ് ചെയ്യാൻ പോകുന്നത്.  പീറ്റർ ഹെയ്‌ൻ, സുപ്രീം സുന്ദർ എന്നിവർ ചേർന്ന് സംഘട്ടനം ഒരുക്കിയ ഈ ചിത്രത്തിൽ ഒരു സർഫിങ് ഇൻസ്ട്രക്ടർ ആയാണ് പ്രണവ് അഭിനയിക്കുന്നത്. മനോജ് കെ ജയൻ, കലാഭവൻ ഷാജോൺ, ധർമജൻ ബോൾഗാട്ടി, ജി സുരേഷ് കുമാർ , ബിജു കുട്ടൻ, ഇന്നസെന്റ്, ഷാജു, സിദ്ദിഖ്, എന്നിവരും ഈ ചിത്രത്തിന്റെ താര നിരയിൽ ഉണ്ട്.