മാസ്സ് ഗാനവുമായി ബാന്ദ്ര ടീം; ഒറ്റ കൊലകൊമ്പനായി ജനപ്രിയന്റെ ബോക്സ് ഓഫീസ് തേരോട്ടം

ജനപ്രിയ നായകൻ ദിലീപിനെ നായകനാക്കി അരുൺ ഗോപി സംവിധാനം ചെയ്ത ബാന്ദ്ര മാസ്സ് വിജയമാണ് നേടുന്നത്. കേരളത്തിൽ തീയേറ്ററുകളിൽ നിന്ന് ഒന്നര കോടിയോളം രൂപ ആദ്യ ദിന കളക്ഷൻ നേടിയ ഈ ചിത്രം രണ്ടാം ദിനവും മികച്ച ഗ്രോസ് കളക്ഷനാണ് നേടിയത്. കുടുംബ പ്രേക്ഷകരുടെ പിന്തുണയോടെ മുന്നേറുന്ന ഈ ചിത്രത്തിന് യുവ പ്രേക്ഷകരുടെ തിരക്കുമുണ്ട്. ഇപ്പോഴിതാ ഈ ചിത്രത്തിലെ ഒരു മാസ്സ് ഗാനത്തിന്റെ ലിറിക്കൽ വീഡിയോ കൂടി റിലീസ് ചെയ്തിരിക്കുകയാണ്. ഒറ്റ കൊലകൊമ്പനാടാ എന്ന വരികളോടെ തുടങ്ങുന്ന ഈ ഗാനത്തിന് വരികൾ രചിച്ചത് അജീഷ് ദാസനാണ്. യാസീൻ നിസാർ ആലപിച്ചിരിക്കുന്ന ഈ ഗാനത്തിന് ഈണം പകർന്നിരിക്കുന്നത് സാം സി എസ്‌ ആണ്. അദ്ദേഹമൊരുക്കിയ പശ്‌ചാത്തല സംഗീതവും ഈ ചിത്രത്തിന് നൽകിയ മാസ്സ് ഫീൽ വളരെ വലുതാണ്. അലക്സാണ്ടർ ഡൊമിനിക് എന്ന ആല ആയി ദിലീപ് നൽകിയ പ്രകടനമാണ് ബാന്ദ്രയുടെ മറ്റൊരു ഹൈലൈറ്റ്. അത്ര ഗംഭീരമായാണ് അദ്ദേഹം ഈ കഥാപാത്രത്തിന് ജീവൻ പകർന്നത്.

ആലയുടെ വൈകാരിക നിമിഷങ്ങളും മാസ്സ് സീനുകളും ദിലീപ് എന്ന അഭിനയ പ്രതിഭ മനോഹരമായി പകർന്നാടി. തമിഴ് സൂപ്പർ താരം ശരത് കുമാർ, മമത മോഹൻദാസ്, ബോളിവുഡ് താരം ഡിനോ മോറിയ, തെലുങ്ക്- കന്നഡ താരം ഈശ്വരി റാവു, മിസ്റ്റര്‍ ഇന്ത്യ ഇന്റര്‍നാഷണലും മോഡലുമായ ദാരാസിങ്‌ ഖുറാന, തമിഴിൽ നിന്ന് വിടിവി ഗണേഷ്, സിദ്ദിഖ്, കലാഭവൻ ഷാജോൺ. ലെന, തുടങ്ങി ഒരു വലിയ താരനിരതന്നെ അഭിനയിച്ച ഈ ചിത്രത്തിലെ നായികാ വേഷം അവതരിപ്പിച്ചത് തമന്ന ഭാട്ടിയ ആണ്. താര ജാനകി എന്ന ബോളിവുഡ് നടിയായി തന്റെ കരിയർ ബെസ്റ്റ് പെർഫോമൻസാണ് തമന്ന നൽകിയത്. ഉദയ കൃഷ്ണ തിരക്കഥ രചിച്ച ബാന്ദ്ര അജിത് വിനായക ഫിലിംസിന്റെ ബാനറിൽ അജിത് വിനായകയാണ് നിർമ്മിച്ചിരിക്കുന്നത്.