മോഹൻലാലിന്റെ ബറോസിൽ സൂര്യ ഉണ്ടാകുമോ?; മറുപടി പറഞ്ഞു താരം..!

മലയാളത്തിന്റെ മഹാനടൻ കമ്പ്ലീറ്റ് ആക്ടർ മോഹൻലാൽ ആദ്യമായി സംവിധാനം ചെയ്യുന്ന ചിത്രമാണ് ബറോസ്, നിധി കാക്കും ഭൂതം. കഴിഞ്ഞ വർഷം ഏപ്രിലിൽ ഈ ചിത്രത്തിന്റെ ഷൂട്ടിംഗ് തുടങ്ങിയെങ്കിലും, കോവിഡ് രണ്ടാം തരംഗം ആരംഭിക്കുകയും ഈ ചിത്രത്തിന്റെ ഷൂട്ടിംഗ് മുടങ്ങുകയും ചെയ്തു. പിന്നീട് ഈ കഴിഞ്ഞ ഡിസംബറിൽ ചിത്രം ആദ്യം മുതൽ തന്നെ ആരംഭിക്കുകയായിരുന്നു. ഏപ്രിൽ പകുതി വരെ ഈ ചിത്രത്തിന്റെ ഷൂട്ടിംഗ് ഉണ്ടാകും എന്ന വിവരമാണ് ഇപ്പോൾ ലഭിക്കുന്നത്. എന്നാൽ അതിനൊപ്പം തന്നെ ഈ ചിത്രത്തിലെ ഒരു പ്രധാന വേഷത്തിൽ തമിഴ് നടൻ സൂര്യയും ഉണ്ടാകുമെന്നുള്ള ചില റിപ്പോർട്ടുകൾ സോഷ്യൽ മീഡിയയിൽ വന്നിരുന്നു. ആ ചോദ്യം ഈ അടുത്തിടെ സൂര്യ കേരളത്തിൽ വന്നപ്പോൾ പത്ര പ്രവർത്തകർ ചോദിക്കുകയും ചെയ്തു. അതിനു ഉത്തരമായി സൂര്യ പറഞ്ഞത് അങ്ങനെ സംഭവിക്കട്ടെ എന്നാണ്. താൻ ആ ചിത്രത്തിൽ ഉണ്ടെന്നോ ഇല്ലെന്നോ സൂര്യ പറഞ്ഞില്ല. അത്കൊണ്ട് തന്നെ പ്രേക്ഷകരുടെ സംശയങ്ങൾ ഇപ്പോഴും ബാക്കിയാണ്.

ഒരു ത്രീഡി ഫാന്റസി ഡ്രാമയായി വമ്പൻ ബഡ്ജറ്റിൽ ഒരുങ്ങുന്ന ഈ ചിത്രം രചിച്ചിരിക്കുന്നത് ജിജോ പുന്നൂസും നിർമ്മിക്കുന്നത് ആശീർവാദ് സിനിമാസിന്റെ ബാനറിൽ ആന്റണി പെരുമ്പാവൂരുമാണ്. നാനൂറു വർഷം പ്രായമുള്ള ബറോസ് എന്ന് പേരുള്ള ഒരു ഭൂതമായാണ് മോഹൻലാൽ ഇതിൽ അഭിനയിക്കുന്നത്. സന്തോഷ് ശിവൻ കാമറ ചലിപ്പിക്കുന്ന ഈ ചിത്രത്തിന് സംഗീതം ഒരുക്കുന്നത് ലിഡിയൻ നാദസ്വരവും എഡിറ്റ് ചെയ്യുന്നത് ശ്രീകർ പ്രസാദുമാണ്. മിന്നൽ മുരളിയിലെ സൂപ്പർ വില്ലൻ ഗുരു സോമസുന്ദരവും ഈ ചിത്രത്തിൽ ഒരു പ്രധാന വേഷം ചെയ്യുന്നുണ്ട്.