ധനുഷിന്റെ ആടുകളം എന്ന ചിത്രത്തില്‍ നിന്ന് തൃഷ പുറത്ത് പോവാന്‍ കാരണം; വൈറലായി ഷൂട്ടിംഗ് ചിത്രങ്ങൾ..!

പത്തു വർഷം മുൻപ് വെട്രിമാരൻ സംവിധാനം ചെയ്തു ധനുഷ് നായകനായി അഭിനയിച്ച ചിത്രമാണ് ആടുകളം. സൂപ്പർ ഹിറ്റായി മാറിയ ഈ ചിത്രം ധനുഷിന് മികച്ച നടനുള്ള ദേശീയ പുരസ്‍കാരവും നേടിക്കൊടുത്തു. മികച്ച സംവിധായകൻ, മികച്ച തിരക്കഥ എന്നിവയുമുൾപ്പെടെ ആറു ദേശീയ പുരസ്‍കാരങ്ങളാണ് ഈ ചിത്രം നേടിയെടുത്തത്. തപ്‌സി പന്നു നായികാ വേഷം ചെയ്ത ഈ ചിത്രത്തി കിഷോർ, വി ഐ എസ് ജയപാലൻ എന്നിവരും പ്രധാന വേഷങ്ങൾ ചെയ്തു. എന്നാൽ ഇപ്പോൾ ഈ ചിത്രത്തിന്റെ ചില ലൊക്കേഷൻ സ്റ്റില്ലുകൾ സോഷ്യൽ മീഡിയയിൽ വൈറലാകുമ്പോൾ അതിൽ പ്രശസ്ത തെന്നിന്ത്യൻ നായികാ തൃഷയെ ധനുഷിനൊപ്പം കണ്ട് അമ്പരക്കുകയാണ് സിനിമാ പ്രേമികൾ. ഈ ചിത്രത്തിൽ തൃഷക്ക് എന്ത് കാര്യമെന്നാണ് പലരും ചോദിക്കുന്നത്. അതിനു പിന്നിൽ നടന്ന സംഭവ വികാസങ്ങൾ ഇങ്ങനെ.

ആദ്യം ഈ ചിത്രത്തിലെ നായികയായി വെട്രിമാരൻ തീരുമാനിച്ചത് നടി ശ്രേയ ശരണിനെ ആയിരുന്നു. പക്ഷെ ഡേറ്റ് ക്ലാഷ് മൂലം ശ്രേയ പിന്മാറിയപ്പോൾ വെട്രിമാരൻ തൃഷയോട് ഈ കഥ പറയുകയും, തൃഷ ഈ ചിത്രത്തിന്റെ ഭാഗമാവുകയും ചെയ്തു. തൃഷയെ വെച്ച് ആടുകളം ചിത്രീകരണവും അവർ ആരംഭിച്ചിരുന്നു. ആ സമയത്തെ ലൊക്കേഷൻ സ്റ്റില്ലുകളാണ് ഇപ്പോൾ സോഷ്യൽ മീഡിയയുടെ ശ്രദ്ധ നേടിയെടുക്കുന്നത്. എന്നാൽ, ഷൂട്ടിങ്ങിൽ ചില വൈകലുകൾ വന്നതോടെ തൃഷ ചെയ്തുകൊണ്ടിരുന്ന മറ്റൊരു ചിത്രത്തിന്റെ ഡേറ്റുമായി ക്ലാഷ് ആവുകയും ആ സിനിമ ഭൂരിഭാഗവും ഷൂട്ട് ചെയ്തു തീർന്നിരുന്നതിനാൽ, അത് തീർക്കാനായി തൃഷക്ക് ആടുകളം ഉപേക്ഷിക്കേണ്ടതായും വന്നു. അങ്ങനെയാണ് തപ്‌സി പന്നു ഈ ചിത്രത്തിൽ എത്തുന്നത്. സൂപ്പർ ഹിറ്റായി മാറിയ, ഗൗതം വാസുദേവ് മേനോൻ ചിത്രം വിണ്ണൈത്താണ്ടി വരുവായക്കു വേണ്ടിയാണു തൃഷ ആടുകളം ഉപേക്ഷിച്ചത്.

ആ ചിത്രത്തിലെ ജെസി എന്ന കഥാപാത്രം തൃഷയുടെ കരിയറില്‍ തന്നെ ഏറ്റവും കൂടുതൽ പ്രാധാന്യമർഹിക്കുന്ന കഥാപാത്രങ്ങളിലൊന്നായി മാറി. തപ്‌സിയുടെ ആദ്യത്തെ തമിഴ് ചിത്രമായിരുന്നു ആടുകളം എങ്കിലും ഈ നടിയുടെ കരിയറിൽ ആടുകളം വലിയ പ്രാധാന്യമര്ഹിക്കുന്നില്ല എന്ന് തന്നെ പറയാം. തപ്‌സി ശ്രദ്ധ നേടിയെങ്കിലും ആടുകളം പൂർണ്ണമായും ഒരു ധനുഷ് ചിത്രമായാണ് എന്നും അറിയപ്പെടുന്നത്. പിങ്ക് എന്ന ബോളിവുഡ് ചിത്രത്തിലെ ഗംഭീര പ്രകടനമാണ് തപ്‌സി എന്ന നടിയെ ഇന്ത്യ മുഴുവൻ പ്രശസ്തയാക്കിയത്.