മുത്തുവേൽ പാണ്ട്യനെ വിറപ്പിച്ച വർമ്മ; ജയിലറിലെ വില്ലനായി ത്രസിപ്പിച്ച് വിനായകൻ.

നെൽസൺ ദിലീപ്കുമാർ രചിച്ചു സംവിധാനം ചെയ്ത രജനികാന്ത് ചിത്രമായ ജയിലർ ഇപ്പോൾ വമ്പൻ കയ്യടി നേടി റെക്കോർഡ് വിജയത്തിലേക്കാണ് കുതിക്കുന്നത്. സൂപ്പർസ്റ്റാർ രജനികാന്തിനൊപ്പം, കംപ്ലീറ്റ് ആക്ടർ മോഹൻലാൽ, കന്നഡ സൂപ്പർ താരം ശിവരാജ് കുമാർ എന്നിവരും തകർത്താടിയ ചിത്രത്തിൽ തന്റെ പ്രകടനം കൊണ്ട് സൂപ്പർസ്റ്റാറിനെ പോലും വിറപ്പിച്ച ഒരാൾ കൂടിയുണ്ട്. അതീ ചിത്രത്തിലെ വില്ലൻ കഥാപാത്രത്തിന് ജീവൻ പകർന്ന മലയാളി നടനായ വിനായകനാണ്. വർമ്മ എന്ന മലയാളി കഥാപാത്രമായാണ് വിനായകൻ ഈ ചിത്രത്തിൽ അഭിനയിച്ചത്. വിഗ്രഹശിലകൾ കള്ളക്കടത്ത് നടത്തുന്ന, എന്തും ചെയ്യാൻ മടിക്കാത്ത വില്ലനായി വിനായകൻ അക്ഷരാർത്ഥത്തിൽ തിരശീലയിൽ ജീവിക്കുകയായിരുന്നു. അത്ര ഗംഭീരമായിരുന്നു വിനായകന്റെ പ്രകടനം.

തന്റെ ഡയലോഗ് ഡെലിവറി സ്റ്റൈൽ കൊണ്ടും, ശരീര ഭാഷ കൊണ്ടും മുഖ ഭാവങ്ങൾ കൊണ്ടും ഈ നടൻ കൂടെ നിന്നവരെ മുഴുവൻ നിക്ഷ്പ്രഭമാക്കി എന്ന് പറഞ്ഞാലും അതിശയോക്തിയാവില്ല. പേടിപ്പെടുത്തുന്ന രീതിയിൽ അഭിനയിച്ച വിനായകൻ അതോടൊപ്പം പ്രേക്ഷകരിൽ ചിരി നിറക്കുന്ന രംഗങ്ങളും ചിത്രത്തിലുണ്ട്. രജനികാന്തിനൊപ്പമുള്ള രംഗങ്ങളിൽ വിനായകനാണ് പ്രകടനം കൊണ്ട് മുന്നിട്ട് നിന്നതെന്നു പറഞ്ഞാൽ, അതിനോട് പ്രേക്ഷകർ പൂർണ്ണമായും യോജിക്കുമെന്നുറപ്പാണ്. സൂപ്പർതാരത്തെ പോലും പിന്നിലാക്കിയ ഈ ഞെട്ടിക്കുന്ന പ്രകടനം വിനായകൻ എന്ന നടന് തമിഴിൽ കൊടുക്കാൻ പോകുന്നത് വലിയ മുന്നേറ്റമായിരിക്കും എന്നതിന് സംശയമില്ല. അത്കൊണ്ട് തന്നെ ജയിലർ ഇപ്പോൾ നേടുന്ന ഈ മഹാവിജയത്തിൽ വർമ്മയായി തകർത്താടിയ വിനായകന്റെ പങ്ക് വളരെ വലുതാണ്