കേരളത്തിൽ പുതിയ ചരിത്രം കുറിച്ച് രജനികാന്ത്; ജയിലർ ആദ്യ ദിന കേരള കളക്ഷൻ റിപ്പോർട്ട് പുറത്ത്.

ഇന്നലെയാണ് ഏവരും കാത്തിരുന്ന സൂപ്പർസ്റ്റാർ രജനികാന്ത് ചിത്രം ജയിലർ പ്രേക്ഷകരുടെ മുന്നിലെത്തിയത്. വമ്പൻ സ്വീകരണം ലഭിച്ച ഈ നെൽസൺ ദിലീപ്കുമാർ ചിത്രത്തിന് ഗംഭീര പ്രേക്ഷക പ്രതികരണമാണ് ലഭിച്ചത്. കേരളത്തിലും ആവേശകരമായ സ്വീകരണമാണ് ജയിലർ നേടിയത്. അതിന് കാരണം കംപ്ലീറ്റ് ആക്ടർ മോഹൻലാൽ ഈ ചിത്രത്തിൽ അതിഥി വേഷത്തിൽ എത്തുന്നുണ്ട് എന്നതായിരുന്നു. ഇന്ന് വരെ ഒരു രജനികാന്ത് ചിത്രത്തിനും ലഭിക്കാത്ത വരവേൽപ്പാണ് ഈ ചിത്രത്തിന് ലഭിച്ചത് എന്നത് തന്നെ അതിന് തെളിവാണ്. ഇപ്പോഴിതാ ജയിലറിന്റെ ആദ്യ ദിന കേരള കളക്ഷൻ റിപ്പോർട്ടുകൾ പുറത്ത് വരുമ്പോൾ അത് വീണ്ടും തെളിയിക്കപ്പെടുകയാണ്. രജനികാന്തിന്റെ കരിയറിൽ ആദ്യമായി കേരളത്തിൽ നിന്ന് ആദ്യ ദിനം 5 കോടിക്ക് മുകളിൽ കളക്ഷൻ നേടുന്ന ഒരു ചിത്രം സംഭവിച്ചിരിക്കുകയാണ്.

ട്രേഡ് അനലിസ്റ്റുകൾ പുറത്ത് വിടുന്ന ആദ്യ കണക്കുകൾ പ്രകാരം, ജയിലർ കേരളത്തിൽ നിന്നും നേടിയ ആദ്യ ദിന ഗ്രോസ് അഞ്ചിനും അഞ്ചര കോടിക്കും ഇടയിലാണ്. മാത്രമല്ല, ഈ വർഷം ഒരു സിനിമ കേരളത്തിൽ നിന്നും നേടുന്ന ഏറ്റവും വലിയ ഓപ്പണിങ് ഡേ ഗ്രോസ് കൂടിയാണ് ജയിലർ സ്വന്തമാക്കിയത്. നാലര കോടിയോളം ആദ്യ ദിനം ഗ്രോസ് നേടിയ ദളപതി വിജയ് ചിത്രം വാരിസിനെയാണ് ജയിലർ മറികടന്നത്. സൺ പിക്ചേഴ്സ് നിർമ്മിച്ച ഈ ചിത്രം കേരളത്തിൽ വിതരണം ചെയ്തത് ശ്രീ ഗോകുലം മൂവീസാണ്. മാത്യു എന്ന മരണ മാസ്സ് കഥാപാത്രമായി ഇതിൽ വരുന്ന മോഹൻലാലിന്റെ സാന്നിധ്യം കേരളത്തിലും മോഹൻലാലിൻറെ ശക്തി കേന്ദ്രമായ ഗൾഫിലും വമ്പൻ മുന്നേറ്റമാണ് ജയിലറിന് നൽകിയത്