വികടകുമാരൻ ട്രൈലെർ റിലീസ് ചെയ്തു മെഗാ സ്റ്റാർ മമ്മൂട്ടി..

ബോബൻ സാമുവൽ സംവിധാനം ചെയ്ത വികട കുമാരൻ എന്ന ചിത്രത്തിന്റെ ട്രൈലെർ ഇന്ന് മെഗാ സ്റ്റാർ മമ്മൂട്ടി റിലീസ് ചെയ്തു. വിഷ്ണു ഉണ്ണികൃഷ്ണൻ- ധർമജൻ ബോൾഗാട്ടി ടീം പ്രധാന വേഷങ്ങളിൽ എത്തിയിരിക്കുന്ന ഈ ചിത്രത്തിലെ നായികാ വേഷത്തിൽ എത്തിയിരിക്കുന്നത് മാനസാ രാധാകൃഷ്ണൻ ആണ്. വൈ വെ രാജേഷ് ആണ് ഈ കോമഡി എന്റെർറ്റൈനെർ ചിത്രത്തിന് തിരക്കഥ രചിച്ചിരിക്കുന്നത്. മാർച്ചിൽ പ്രദർശനം ആരംഭിക്കുന്ന ഈ ചിത്രം നിർമ്മിച്ചിരിക്കുന്നത് ചാന്ദ് വി ക്രീയേഷന്സിന്റെ ബാനറിൽ അരുൺ ഘോഷ്, ബിജോയ് ചന്ദ്രൻ എന്നിവർ ചേർന്നാണ്. നാദിർഷ സംവിധാനം ചെയ്തു സൂപ്പർ വിജയം നേടിയ കട്ടപ്പനയിലെ ഹൃതിക് റോഷൻ എന്ന ചിത്രത്തിന് ശേഷം വിഷ്ണു ഉണ്ണികൃഷ്ണൻ- ധർമജൻ ബോൾഗാട്ടി ടീം ഒന്നിച്ച ചിത്രമാണ് വികട കുമാരൻ. ജനപ്രിയൻ, റോമൻസ്, ഹാപ്പി ജേർണി , ഷാജഹാനും പരീക്കുട്ടിയും എന്നിവയാണ് ബോബൻ സാമുവൽ ഇതിനു മുൻപേ ഒരുക്കിയ ചിത്രങ്ങൾ. ഇതിൽ റോമൻസ് ബ്ലോക്ക്ബസ്റ്റർ വിജയം നേടിയ ചിത്രമാണ്.

റോമൻസിന്റെ അഞ്ചാം വാർഷികം അടുത്ത് വരുന്ന വേളയിൽ ആണ് ഈ ടീം വീണ്ടും ഒരു ചിത്രവുമായി എത്തുന്നത് എന്നതും കൗതുകം ആണ്. അജയ് ഡേവിഡ് കാച്ചപ്പിള്ളി ദൃശ്യങ്ങൾ ഒരുക്കിയ ഈ ചിത്രത്തിന് സംഗീതം നൽകിയിരിക്കുന്നത് രാഹുൽ രാജ് ആണ്. ദീപു ജോസഫ് ആണ് ഈ ചിത്രത്തിന്റെ എഡിറ്റർ. ഒരു കോമഡി ത്രില്ലർ ആയി ഒരുക്കിയ ഈ ചിത്രത്തിൽ സലിം കുമാർ, ഇന്ദ്രൻസ്, ബൈജു, ജിനു ജോസ്, സുനിൽ സുഗത, ദേവിക നമ്പ്യാർ, പാർവതി നായർ, ശ്രീലക്ഷ്മി ഗീതാനന്ദൻ, സീമ ജി നായർ എന്നിവരും അഭിനയിക്കുന്നുണ്ട്. കുഞ്ചാക്കോ ബോബന് ഒപ്പം അഭിനയിച്ച ശിക്കാരി ശംഭു ആയിരുന്നു വിഷ്ണു ഉണ്ണികൃഷ്ണന്റെ കഴിഞ്ഞ റിലീസ്. സുഗീത് ഒരുക്കിയ ഈ ചിത്രം ബോക്സ് ഓഫീസിൽ വിജയം നേടിയെടുത്തിരുന്നു. ഈ വർഷം ജനുവരിയിൽ ആണ് ശിക്കാരി ശംഭു പ്രദർശനത്തിന് എത്തിയത്.