കുട്ടൻ പിള്ളയുടെ ശിവരാത്രിയിലെ ചക്ക പാട്ടു സോഷ്യൽ മീഡിയയുടെ ശ്രദ്ധ നേടുന്നു..!

പ്രശസ്ത നടൻ സുരാജ് വെഞ്ഞാറമൂട് നായകനായി എത്തുന്ന ചിത്രമായ കുട്ടൻ പിള്ളയുടെ ശിവരാത്രിയിലെ ആദ്യ ഗാനം ഇന്ന് റിലീസ് ചെയ്തു. ചക്ക പാട്ട് എന്ന് പേരിട്ടു റിലീസ് ചെയ്തിരിക്കുന്ന ഈ ഗാനം ഇതിനോടകം തന്നെ സോഷ്യൽ മീഡിയയുടെ ശ്രദ്ധ നേടിയെടുത്തു കഴിഞ്ഞു. സയനോര ഫിലിപ്പ് ആണ് ഈ ചിത്രത്തിന് വേണ്ടി ഗാനങ്ങളും പശ്ചാത്തല സംഗീതവും ഒരുക്കിയിരിക്കുന്നത്.

അൻവർ അലി വരികൾ എഴുതിയിരിക്കുന്ന ഈ ചക്ക പാട്ടു ആലപിച്ചിരിക്കുന്നത് സന്നിദാനന്തനും ആർ ജെ നിമ്മിയും ചേർന്നാണ്. രസകരമായ വരികളും മികച്ച സംഗീതവും ഈ പാട്ടിനെ സൂപ്പർ ഹിറ്റാക്കി മാറ്റും എന്ന കാര്യത്തിൽ സംശയമൊന്നുമില്ല. മനോഹരമായ രംഗങ്ങളും ഈ ഗാനത്തിന്റെ സവിശേഷതയാണ്. ഫാസിൽ നാസർ ആണ് ഈ ചിത്രത്തിന് വേണ്ടി ദൃശ്യങ്ങൾ ഒരുക്കിയിരിക്കുന്നത്.

ഇന്ദ്രജിത്തിനെ നായകനാക്കി എയ്‌ഞ്ചൽസ് എന്ന ചിത്രമൊരുക്കിയ, ജീൻ മാർക്കോസ് സംവിധാനം ചെയ്തിരിക്കുന്ന ഈ ചിത്രം നിർമ്മിച്ചിരിക്കുന്നത് രാജി നന്ദകുമാർ ആണ്. ആലങ്ങാട് പ്രൊഡക്ഷൻസിന്റെ ബാനറിൽ നിർമ്മിച്ചിരിക്കുന്ന ഈ ചിത്രത്തിൽ സുരാജ് വെഞ്ഞാറമൂടിനൊപ്പം ബിജു സോപാനം, മിഥുൻ രമേശ്, ശ്രിന്ദ എന്നിവരും അഭിനയിച്ചിട്ടുണ്ട്.

ജോസെലെറ്റ്‌ ജോസഫ് തിരക്കഥ രചിച്ചിരിക്കുന്ന ഈ ചിത്രം എഡിറ്റ് ചെയ്തിരിക്കുന്നത് ഷിബിഷ് കെ ചന്ദ്രൻ ആണ്. പ്ലാച്ചോട്ടിൽ കുട്ടൻ പിള്ള എന്ന അമ്പത്തെട്ടു വയസുള്ള പോലീസ് കോൺസ്റ്റബിൾ ആയാണ് സുരാജ് ഈ ചിത്രത്തിൽ അഭിനയിച്ചിരിക്കുന്നത്. ഈ ചിത്രത്തിന്റെ പോസ്റ്ററുകളും അതുപോലെ തന്നെ അണിയറ പ്രവർത്തകർ അനൗൺസ് ചെയ്ത ഒരു മത്സരവും ഇപ്പോൾ പ്രേക്ഷക ശ്രദ്ധ നേടിയയെടുക്കുന്നുണ്ട്. അധികം വൈകാതെ തന്നെ കുട്ടൻപിള്ളയുടെ ശിവരാത്രി തീയേറ്ററുകളിൽ എത്തും.