ഞെട്ടിക്കുന്ന മേക് ഓവറുമായി വിജയ് സേതുപതി വീണ്ടും; സീതാകത്തി ഫസ്റ്റ് ലുക്ക് വൈറലാവുന്നു..!

മക്കൾ സെൽവൻ വിജയ് സേതുപതി ഇന്ന് തന്റെ ജന്മദിനം ആഘോഷിക്കുകയാണ്. തന്റെ ജന്മദിനത്തിന് അദ്ദേഹം ആരാധകർക്കായി സമർപ്പിച്ചത് സീതാകത്തി എന്ന പുതിയ ചിത്രത്തിന്റെ ഫസ്റ്റ് ലുക്ക് പോസ്റ്റർ. ഞെട്ടിക്കുന്ന മേക് ഓവറിൽ ആണ് ഈ ചിത്രത്തിന്റെ ഫസ്റ്റ് ലുക്ക് പോസ്റ്ററിൽ വിജയ് സേതുപതി പ്രത്യക്ഷപ്പെട്ടിരിക്കുന്നത്. ഒരു വൃദ്ധ കഥാപാത്രം ആയാണ് ഈ ഫസ്റ്റ് ലുക്ക് പോസ്റ്ററിൽ നമ്മുക്ക് വിജയ് സേതുപതിയെ കാണാൻ കഴിയുക. കണ്ടാൽ തിരിച്ചറിയാത്ത വിധം മാറി പോയിരിക്കുന്നു വിജയ് സേതുപതി എന്നത് തന്നെയാണ് ഈ ഫസ്റ്റ് ലുക്ക് പോസ്റ്ററിന്റെ അല്ലെങ്കിൽ ഈ മേക് ഓവറിന്റെ പ്രത്യേകത. ബാലാജി തരണീധരൻ ആണ് ഈ ചിത്രം സംവിധാനം ചെയ്യുന്നത്. വിജയ് സേതുപതിയുടെ ഇരുപത്തിയഞ്ചാമത്തെ സിനിമയാണ് സീതാകത്തി.

സുധൻ സുന്ദരം, ഉമേഷ്, ജയറാം, അരുൺ വൈദ്യനാഥൻ എന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്. പാഷൻ സ്റുഡിയോസിന്റെ ബാനറിൽ ആണ് ഈ ചിത്രം നിർമ്മിക്കുന്നതു. വിജയ് സേതുപതിയുടെ കരിയറിലെ ഏറ്റവും വ്യത്യസ്തമായ വേഷങ്ങളിൽ ഒന്നാണ് ഈ ചിത്രത്തിലേതെന്നു പറയാമെന്നാണ് സംവിധായകനും നിർമ്മാതാക്കളും അവകാശപ്പെടുന്നത്. ഒരു പക്ഷെ അദ്ദേഹത്തിന്റെ കരിയറിലെ നാഴികക്കല്ല് തന്നെ ആവാവുന്ന ഒരു കഥാപാത്രമായി ഇത് മാറുമെന്നും റിപ്പോർട്ടുകൾ സൂചിപ്പിക്കുന്നു. ഗോവിന്ദ് പി മേനോൻ സംഗീതം പകർന്നിരിക്കുന്ന ഈ ചിത്രത്തിന് ദൃശ്യങ്ങൾ ഒരുക്കിയത് സാരസ്കന്തു ടി കെ ആണ്. ആർ ഗോവിന്ദരാജ് ആണ് ഈ ചിത്രത്തിന്റെ എഡിറ്റർ.

ഗോകുൽ ഒരുക്കുന്ന ജുംഗ, ത്യാഗരാജൻ കുമാരസാമി ഒരുക്കുന്ന സൂപ്പർ ഡീലക്സ്, പ്രേം കുമാർ ഒരുക്കുന്ന 96 , അറുമുഖ കുമാർ ഒരുക്കുന്ന ഒരു നല്ല നാൾ പാത്തു സോളരെൻ, മണി രത്‌നം ചിത്രം, അതുപോലെ ചിരഞ്ജീവിയോടും അമിതാബ് ബച്ചനോടും ഒപ്പമുള്ള തെലുഗ് ബ്രഹ്മാണ്ഡ ചിത്രം എന്നിവയാണ് വരാനിരിക്കുന്ന വിജയ് സേതുപതി ചിത്രങ്ങൾ.