വീണ്ടും ധനുഷിനൊപ്പം വെട്രിമാരൻ; വട ചെന്നൈ രണ്ടാം ഭാഗമോ എന്ന ആകാംഷയോടെ ആരാധകർ

ഒരുപിടി ഗംഭീര ചിത്രങ്ങൾ നമ്മുക്ക് സമ്മാനിച്ച കൂട്ടുകെട്ടാണ് ധനുഷ്- വെട്രിമാരൻ ടീം. പൊല്ലാതവൻ, ആടുകളം, വട ചെന്നൈ, അസുരൻ എന്നീ ചിത്രങ്ങൾ നമ്മുടെ മുന്നിലെത്തിച്ച ഇവർ വീണ്ടും ഒരുമിക്കുന്നു എന്ന വാർത്തകളാണ് വരുന്നത്. ദേശീയ തലത്തിൽ വരെ അംഗീകരിക്കപ്പെട്ട ചിത്രങ്ങളാണ് ഇവരിൽ നിന്ന് ലഭിച്ചിട്ടുള്ളത്. അതിൽ തന്നെ വട ചെന്നൈ എന്ന ചിത്രത്തിനു രണ്ടാം ഭാഗമുണ്ടാകുമെന്നു ആ ചിത്രം റിലീസായ സമയത്തു തന്നെ റിപ്പോർട്ടുകൾ വന്നിരുന്നു. ഇപ്പോൾ ധനുഷുമായി വെട്രിമാരൻ വീണ്ടും ഒന്നിക്കുമെന്നു വെളിപ്പെടുത്തിയപ്പോൾ ആരാധകരും സിനിമാ പ്രേമികളും ചോദിക്കുന്നത് അത് വട ചെന്നൈ 2 ആയിരിക്കുമോ എന്നാണ്.

ധനുഷിന്റെ തിരുചിത്രമ്പലം എന്ന പുതിയ സിനിമയുടെ ഓഡിയോ ലോഞ്ചിൽ പങ്കെടുക്കവേ വെട്രിമാരൻ തന്നെയാണ് താൻ വീണ്ടും ധനുഷിനൊപ്പം ഒരു ചിത്രം ചെയ്യുമെന്ന് പ്രഖ്യാപിച്ചത്. എന്നാൽ അത് ഉടനെ ഉണ്ടാവില്ലായെന്നും താൻ ഇപ്പോൾ കമ്മിറ്റ് ചെയ്തിരിക്കുന്ന ചിത്രങ്ങൾ പൂർത്തിയാക്കിയതിന് ശേഷമാണ് ആ ചിത്രം ഉണ്ടാകുയെന്നുമാണ് വെട്രിമാരൻ പറയുന്നത്. 2018 ലാണ് വട ചെന്നൈ എന്ന ചിത്രത്തിന്റെ ആദ്യ ഭാഗം റിലീസായത്. പ്രേക്ഷകരും നിരൂപകരും വലിയ കൈയടി നൽകിയ ചിത്രമാണ് വട ചെന്നൈ. ആൻഡ്രിയ, സമുദ്രക്കനി, അമീർ, ഡാനിയേൽ ബാലാജി, ഐശ്വര്യ രാജേഷ് എന്നിവരും ഈ ചിത്രത്തിൽ പ്രധാന വേഷങ്ങൾ ചെയ്തു. വെട്രിമാരൻ ഇനി ചെയ്യാൻ പോകുന്നത് സൂര്യ നായകനായ വാടിവാസൽ എന്ന ചിത്രമാണ്. കലൈപുലി എസ് താണു നിർമ്മിക്കാൻ പോകുന്ന ഈ ചിത്രം ജെല്ലികെട്ടിന്റെ പശ്ചാത്തലത്തിലാണ് കഥ പറയുക. വിടുതലൈ എന്ന ചിത്രമാണ് വെട്രിമാരന്റെ അടുത്ത റിലീസ്.